БИШКЕК, 18-мар. — Sputnik. Кыргызстандык спортчу Эржан Тургунбеков профессионалдар арасындагы бокс боюнча эл аралык турнирге катышат. Бул туурасында мелдешти уюштуруп жаткан RCC Boxing Promotions уюмунун ВКонтакте баракчасында айтылат.
Маалыматка ылайык, мелдеш 23-мартта Екатеринбург шаарында өтмөкчү. Анда Тургунбеков 55 килограмм салмакта россиялык Александр Куимчиди менен беттешет.
"Эржан Тургунбеков профессионалдар арасында былтыр гана күч сынашып баштаган. Өз кезегинде Андрей Исаев, Леван Циклаур өңдүү тажрыйбалуу боксчуларды утуп, дүйнө рейтингиндеги 1531 мушкердин арасынан 348-орунга көтөрүлдү", — деп айтылат маалыматта.
Спортчу 24 жашта. Бокс боюнча жаштар арасында КРдин эки жолку чемпиону жана Евразия оюндарынын күмүш байге ээси. RCC Boxing Promotions уюму менен 2018-жылы беш жылга келишим түзгөн.
