ЧОЛПОН-АТА, 3-сен. — Sputnik. Казакстандын көк бөрүчүлөрү кечээ оюнга чыкпай койгонуна уюштуруучулардын аларга ат бербей койгону себеп болду. Бул туурасында Sputnik Кыргызстан агенттигинин кабарчысына курама команданын башкы машыктыруучусу Канагат Сүйбаев билдирди.
Белгилей кетсек, Казакстандын курама командасы кечээ, 2-сентябрда, Красноярск крайынан (Россия) келген оюнчулар менен беттешмек. Бирок белгисиз себептер менен оюн талаасына чыккан эмес.
Бүгүн да коңшу өлкөнүн көк бөрүчүлөрүн ипподромдон кезиктире албадык, мындан улам жайгашкан мейманканасына барып жолугуп чуунун чоо-жайын билдик. Башкы машыктыруучу Канагат Сүйбаев казак командасы өзүнүн аттарын алып келбегенин моюндады.
"Уюштуруучулар менен мурда сүйлөшкөндө жакшы аттарды берүүнү убадалаган. Бирок келгенибизде ат бербей коюшту. Бизге ылайыктуусун таппай калыштыбы билбейм, эки күндөн бери ат мине элекпиз. Азыркыга чейин бере турган аттарын көрсөтө элек. Бүгүн Кыргызстандын Көк бөрү федерациясынын жетекчиси "маселе чечилди, ат беребиз" деп жатат, аны түштөн кийин барып көрөбүз. Биз да финалда ойногубуз келет, алсыз аттар менен биринчи айлампада эле жеңилип калмакпыз", — деди Сүйбаев.
Ошондой эле ал оюнга чыкпай коюшуна дагы бир себеп биринчи атаандашы Красноярск командасынын бир оюнчусу Кыргызстандын жараны экен деп шек санап нааразычылык билдиришкенин айтат. Бирок ал улакчыны калыстар коллегиясы текшерип, оюнчунун РФ жараны экенин аныкталды дейт.
Сүйбаев казак улакчылары Көчмөндөр оюндарына жаздан бери даярданганын айтып берди. Бирок команда чыныгы таймашты Өзбекстандагы Азия чемпионатында көрсөтө турганы белгилейт.
"Казакстандын көк бөрү командасы чоңдор, жаштар жана өспүрүмдөр болуп үчкө бөлүнөт. Бул жакка жаштар командасын алып келдик. Алар күчкө толуп, жетилип калган балдар. Ар бир спортчу өз жеринде жеңсем дейт. Биз "достук утсун, жеңиш болбосо да оюн көрсөтөлү" деп келдик. Боордош элбиз, дос-душманга күлкү болбош үчүн мыкты оюн көрсөтүп көк бөрүнүн деңгээлин көтөрүшүбүз керек. Башкы масатыбыз ушул. Кыргызстанга утуш тилейбиз. Биздин негизги даярдыктар Өзбекстандагы Азия чемпионатына багытталган. Ошол нейтралдуу зонада, башка өлкөнүн жаранын калыс кылып чыныгы беттешти өткөрөбүз", — деди Сүйбаев.
Белгилей кетсек, көк бөрү боюнча 11 команда күч сынашууда. Кечээги оюндарда өзбекстандык оюнчулар Башкыртстанды 20:1, Кыргызстандын улуттук курама командасы монголдорду 29:5 эсебинде жеңип алды.
Көк бөрүнү ойноо тартиби менен Sputnik Кыргызстан агенттигинин материалынан таанышыңыздар.
