БИШКЕК, 3-сен. — Sputnik. Казакстандын көк бөрү боюнча курама командасы бүгүн, 2-сентябрда саат 12.30да Красноярский крайынан (Россия) келген оюнчулар менен беттешмек. Бирок белгисиз себептерден улам казак оюнчулары оюн талаасына чыккан жок.
Бул боюнча социалдык тармактын колдонуучулары дагы жазып чыгышты.
Sputnik Кыргызстан агенттигинин кабарчысы Көк бөрү федерациясынын президенти Жыргалбек Саматов менен байланышканда бул боюнча калыстардын комиссиясы түзүлүп маселе каралып жатканын айтты.
"Азырынча бир нерсе деп айтып, пикир билдирүү эрте. Маселе каралып жатат. Ошонун жыйынтыгы чыкканда түшүндүрмө беребиз", — деди Саматов.
Учурда Ысык-Көлдө Көчмөндөрдүн дүйнөлүк үчүнчү оюндары өтүп жатат. Бүгүн Кыргызстандын көк бөрү боюнча улуттук курама командасы монголиялыктар менен кез келип, 29:5 эсебинде жеңишке жетти.
