БИШКЕК, 28-фев. – Sputnik. Грек-рим күрөшү боюнча курама командадан Акжол Махмудов (72 килограммга чейин) менен Атабек Азисбеков (82 килограмга чейин) финалга чыкты.
Ушул тапта Бишкектеги Каба уулу Кожомкул атындагы спорт сарайында күрөштүн түрлөрү боюнча Азия чемпионаты өтүүдө, ал 4-мартта жыйынтыкталат.
Махмудов болжолдуу кармашында иорданиялык атаандашы Ахмад Махмуд Ахмед Дахшаны 12:2 эсеп менен жеңген. Чейрек финалда индиялык балбанды 8:0, жарым финалда япон балбанын 7:0 менен жеңип чечүүчү кармашка жолдомо алды. Финалда анын атаандашы казак балбаны Демеу Жадыраев боло турганы айтылды.
Ал эми Каныбек Жолчубеков (60 килограммга чейин) чейрек финалда утулган, бирок атаандашы финалга чыккандыктан, коло байге үчүн күрөшө алат. Ошондой эле жарым финалда утулган Роман Царев (67 килограммга чейин) менен (67 килограммга чейин) Үзүр Жузупбековдун (97 кг) атаандаштары финалга чыкса, үчүнчү орун үчүн күч сынаша алышат.
Финалдык беттешүүлөр саат 18:00дө башталат.
Азия чемпионатынын биринчи күнүндө балбандар эки күмүш, эки коло алган.
