БИШКЕК, 3-фев. — Sputnik. Кыргызстандык спортчу, аралаш жоокер искусствосу, муай-тай жана кикбоксинг боюнча дүйнөнүн бир нече жолку чемпиону Валентина Шевченко мушкерлердин UFC (Ultimate Fighting Championship) дүйнөлүк рейтингинде мыкты экенин дагы бир жолу далилдеди. Бул туурасында уюмдун расмий сайтында көрсөтүлгөн.
Буга чейин экинчи орунда турган Шевченко жылдын жаңырышы менен биринчи орунга чыккан. Эми ушул позициясын бербей келет. Анткен менен кыргызстандык мушкердин келечектеги атаандашы Аманда Нуньез абсолюттук чемпион бойдон калууда. Ал эми Шевченко менен жакында эле беттешке чыккан Жулианна Пенья эки позицияга артка кетип төртүнчү орунду ээледи. Үчүнчүдө Холли Холм турат.
Шевченко рейтингдеги биринчи орунду 28-январда венесуэлалык Жулианна Пенья менен беттешке чыгып жеңүүчү аталганына байланыштуу сактап кала алды.
Ultimate Fighting Championship — аралаш мушташ боюнча Түндүк Америкада, Европада жана Азияда турнир өткөргөн спорт уюму. Анын башкы кеңсеси Лас-Вегас шаарында жайгашкан.
