БИШКЕК, 16-апр. — Sputnik. Эч кимге аёо болбойт, коюлган бардык талаптар токтоосуз аткарылышы керек. Бул тууралуу биринчи вице-премьер Кубатбек Боронов ыкчам штабдын жыйынында айтканын өкмөттүн маалымат кызматы кабарлады.
Жыйында Боронов тийиштүү органдарга СOVID-19 вирусун жуктурган бейтаптар менен байланышта болгондорго көзөмөлдү күчөтүү керектигин айтты.
Азыркы тапта үй карантининде 7 537 адам кармалууда.
"Жер-жерлерде коронавирус жугузган адам менен байланышта болгондордун үй карантин шарттарын сактап жатканын катуу көзөмөлдөш керек. Эч кандай кемчиликтерге жол берилбеши зарыл. Укук коргоо органдары алардын коңшу, тууган же башкалар менен жолугуп, чогулуп жатканын тыкыр карап турушу кажет. Карантин бузуп же ооруну башка бирөөгө жугузса жоопкерчиликке тартыларын эскерткиле. Баарыбыздан суроо-талап өтө чоң. Бул өмүр менен өлүм маселеси. Биздин ката кетирүүгө укугубуз жок", — деди Боронов.
Жыйында өкмөттүн Нарын облусундагы ыйгарым укуктуу өкүлчүлүгүнө, тармактык мамлекеттик органдарга өзгөчө абал режимин киргизүүгө байланыштуу посттордо кызматкерлерди коргонуу кийимдери, ысык тамак менен камсыздоону жөнгө салуу тапшырылды.
Өзгөчө кырдаалдар министрлигине Бишкектеги обсервациялык пункттарды даярдоону тездетүү милдеттендирилди.
Ошондой эле өкмөттүн облустардагы ыйгарым укуктуу өкүлдөрүнө, райондордун акимдерине жер-жерлерде дыйкандарды айыл чарба техникасын оңдоо үчүн зарыл тетиктерди сатып алуусуна бардык шарттарды түзүү тапшырмасы берилди.
Коронавирустун кесепети
25-марттан баштап өлкөдөгү эпидемиологиялык кырдаалдан улам Бишкек, Ош жана Жалал-Абад шаарларына, Ноокат, Кара-Суу жана Сузак райондоруна өзгөчө абал киргизилген. Мындай режимге 15-апрелден тарта Нарын шаары менен Ат-Башы району да кошулду. Ал эми калган аймактарда өзгөчө кырдаал тартиби иштеп жатат.
Өлкөдө эмне болуп жаткандыгы тууралуу Sputnik Кыргызстандын тексттик трансляциясынан таанышсаңыз болот.
Ошондой эле кабарларды ыкчам, ыңгайлуу шартта окуу үчүн Telegram-каналыбызга да баш багыңыз.
