09:53 05 Кулжа 2020
Түз эфир
  • USD73.9200
  • EUR82.8348
  • RUB1.0711
Коом
Кыскача шилтеме алуу
Коронавируска байланыштуу Кыргызстандагы кырдаал (1497)
713 0 0

Адистер штабга Бишкектен да COVID-19 табылгандыктан облуска келгендерди обсервацияга жаткыруу же киргизбөөнү сунуштаган.

БИШКЕК, 30-мар. — Sputnik. Бүгүндөн тарта Талас облусуна кирип-чыгууга толугу менен тыюу салынды. Бул тууралуу Sputnik Кыргызстанга өкмөттүн Таластагы өкүлүнүн биринчи орун басары Канимет Осмонбеков билдирди.

Анын айтымында, аймактардан келген адамдардын саны көп болуп жаткандыктан облустук ыкчам штаб бүгүн, 30-мартта, чектөө чечимин кабыл алган.

“Бишкек шаарына өзгөчө абал киргизилгенине байланыштуу көбү Таласка агылып келип жатат. Саламаттык сактоо министрлигинде иштеген адистер “Бишкекте дагы оорунун очогу бар, келгендерди обсервацияга жаткырыш керек же токтотуш керек” деген сунуш беришти. Башка аймактагы жарандарыбызга вирус ташуучу болбой отуруп туруңуздар деп үч күндөн бери эскертип жатабыз. Мындан улам Таласта каттоосу бар адамдардын дагы кирүүсүнө тыюу салынды. Көпчүлүгүнүн каттоосу Таласта болгону менен Бишкекте туруктуу жашаган жайы бар да”, — деди Осмонбеков.

Ошондой эле ал Таластан дагы эч ким чыгарылбай турганын эскертти. Мындан улам облус тургундарынан штабдын чечимин туура кабыл алып, коронавирустун жайылышын ооздуктоого көмөк көрсөтүүнү өтүнгөн.

Киргизилген чектөөлөр азык-түлүк жана жазгы талаа иштерине керектелчү каражаттарды ташыгандарга, транзиттик жүктөргө тийиштүү эмес.

Учурда коронавирус жуктурган Бишкек менен Чүйдө 10, Ошто 33, Жалал-Абадда 49, Нарын менен Баткен облустарында бирден адам аныкталган. Ал эми Ысык-Көл менен Талас облустарында бир да факты жок.

Коронавирус Кыргызстанда

Кыргызстанда коронавируска кабылгандардын саны 94кө жетти. Ал эми бүгүн Сузактын үч тургуну айыгып чыкканы кабарланды.

Бишкек, Ош, Жалал-Абад шаарлары менен Сузак, Кара-Суу, Ноокат райондоруна өзгөчө абал киргизилип, кечки саат 20:00дөн кийин көчөгө чыгууга тыюу салынган. Мындай режим 15-апрелге чейин уланат.

Ушу тапта өлкө ичинде абал кандай болуп жатканын Sputnik Кыргызстан жүргүзгөн тексттик баяндамадан билүүгө болот.

 

Тема:
Коронавируска байланыштуу Кыргызстандагы кырдаал (1497)

Тема боюнча

Кыргызстандын аймагында үшүк жүрөт! ӨКМ шашылыш билдирүү таратты
Кечээ коронавирус табылган 26 адамдын көбү өлкө ичинде жүрүп жуктурган
Блокпосттогу дарыгер, милиционер, аскерлерге кандай тамак берилүүдө. Сүрөт

ЭҢ МААНИЛҮҮ