04:23 26 Бугу 2019
Түз эфир
  • USD69.8500
  • EUR78.1272
  • RUB1.0811
Портфель. Архивдик сүрөт

Жалил Атамбаев деген ким жана элге эмнеси менен таанылды

© AFP 2019 / GREG BAKER
Коом
Кыскача шилтеме алуу
601620

Оштогу байлардын сап башында делген Жалил Атамбаев кызуу талкуунун чордонуна түштү. Буга анын салыктан буйтаганы тууралуу видео иликтөө жарыяланганы жана журналистти сотко бергени себеп болду. Ал ишкер делгени менен бир да компаниянын жетекчиси катары расмий катталган эмес.

"Азаттык" радиосунун журналисти Ыдырыс Исаков "Салыктан буйтаган ишкерлер" деген темада иликтөө даярдап, Жалил Атамбаевге тиешелүү делген компаниялар салык төлөбөй жүргөнүн көрсөткөн. Мындан сырткары, аны менен иштешип аягында макулдашылган акчасын ала албай калган адамдар да арызданган. Бул иликтөө чыккандан кийин Атамбаев Ош шаардык сотуна кайрылып, "жалаа жабуу менен ар-намысыма шек келтирди" деген жүйө менен журналистти 50 миллион сомдук доого жыгууну сураган. Бул элдин жана журналисттер коомчулугунун нааразычылыгын жараткан. Түрдүү кол чогултуулар да башталган эле. Бирок Жалил Атамбаев 7-май күнү "Орозо айында кечирдим" деп доосун кайра кайтарып алды. Ал эми Экономикалык кылмыштарга каршы күрөш боюнча мамлекеттик кызмат (Финансы полициясы) бул боюнча текшерүү иштерин баштады.

Sputnik Кыргызстан агенттиги Ички иштер органдарынан ишкерликке оогон Жалил Атамбаев тууралуу маалыматтарды чогултту.

Жалил Атамбаев 1965-жылы Ош облусунун Кара-Кулжа районуна караштуу Чалма айылында туулган. Милициянын отставкадагы полковниги. Ноокат райондук милиция бөлүмүн жетектеген. Эки-үч жылдай "Ош" аэропортунун Аба транспорту бөлүмүнүн башчысы болуп иштеп, 2016-жылы февралда кызматтан бошоп кеткен. Былтыр Кыргызстандын Грек-рим күрөшү федерациясынын вице-президенти болуп шайланган. Бир тууган агасы Нурпазыл Атамбаев "Ак Жол" партиясынын тизмеси менен Жогорку Кеңештин IV чакырылышынын (2007-2010-жылдары) депутаты болгон. 

Ош посетил заслуженный тренер России Абдулманап Нурмагомедов — отец и тренер популярного бойца UFC Хабиба Нурмагомедова
© Фото / комитет по физической культуре и спорту Оша
Жалил Атамбаевдин (оң тараптагы) белгилүү мушкер Хабибдин атасы Абдулманап Нурмагомедовду Оштон тосуп алган сүрөтү

Байлыгы билинбеген бай

Айрым жалпыга маалымдоо каражаттарында Жалил Атамбаев Ошто эң бай адам катары айтылганы менен каяктан, кантип киреше таап жатканы белгисиз. Тагыраак айтканда, Юстиция министрлигинен бир да компаниянын жетекчиси катары каттоодон өткөн эмес. Интернет булактарда ал тууралуу маалымат жокко эсе, бир-эки гана сүрөтүн табууга болот. Жергиликтүү тургундар Атамбаев катардагы милиционер кезинде ишкерликти канистрлеп күйүүчү май сатуу менен баштаган дешет. Учурда ага тиешелүү кафе, ресторандар, курулуш компаниялары бар экени да айтылат.

"Салимбай байбачага" байланышкан видео

Былтыр Жалил Атамбаев, ЖКнын экс-депутаты Нургазы Айдаровдун Өзбекстандагы таасири чоң бизнесмен Салимбай Абдувалиев менен (Салимбай байбача) жүргөн видеосу тараган. Видео интернет айдыңында желдей тарап, Атамбаев менен Айдаров "Кыргызстандын аброюна шек келтирди" деп сынга кабылган.

Диссертация жактаган

Жалил Атамбаев 2012-жылы Юридика илимдеринин кандидаты болуу үчүн "Жыныстык кылмыштардын криминологиялык жана кылмыш-жаза-укуктук мүнөздөмөсү" деген темада диссертация жазган. Бул эмгегин Кыргыз-Россия Славян университетинде жактаган.

Анын илимий жетекчиси азыркы ИИМ Академиясынын начальнигинин орун басары Арзыгүл Жоробекова болгон. Ал эми расмий оппоненттери Кыргыз илиминин эмгек сиңирген ишмери, юридика илимдеринин доктору, профессор Карпек Курманов жана учурдагы Коопсуздук кеңешинин катчысы Дамир Сагынбаев экени көрсөтүлөт.

Тема боюнча

Тилек Матраимов "алачыкта" жашайт экен. Оштогу акимдердин кандай байлыгы бар?
Элесиң турат, өзүң жок... Табышмактуу Райымбек Матраимов тууралуу 5 факты
Белгилер:
Жалил Атамбаев, бай, журналист, салык, ишкер, милиция, Ош

ЭҢ МААНИЛҮҮ