БИШКЕК, 31-авг. — Sputnik. Эркиндик эч качан белекке берилбейт, эркиндик үчүн ата-бабалар кылымдар бою тынымсыз күрөшүп келди.Бул тууралуу президент Сооронбай Жээнбеков кыргызстандыктарды эгемендүүлүк күнү менен "Ала-Тоо" аянтында куттуктап жатып айтты.
"Бүгүн — улуу салтанат. Элибиз эзелтеден эӊсеп келген эркиндикке жеткен күн. Улутубуздун үмүтү, тилеги, мүдөөсү ишке ашкан күн. Өз алдынча мамлекет болуп, дүйнө цивилизациясында, адамзаттын улуу көчүндө өз ордубузду таптык деп туу көтөргөн күнүбүз", — деп айтылат куттуктоодо.
Өлкө лидери Кыргызстандын соңку тарыхы жөнүндө сөз кылып жатып, жүрөгүндө оту, жүлүнүндө намысы бар кыргыз баласы үчүн эркиндик каны менен кошо айланган баалуулук экенин тарых дагы далилдеп турганын белгиледи.
Ошондой эле Жээнбеков өлкөнүн өнүгүүсү — ар бир жарандын мекенге болгон патриоттук сезимине байланыштуу экенин белгиледи. Анын айтымында, жарандын укугун коргоп, анын эркиндигин сыйлаган мамлекетте жашаган адам гана ошол өлкөнүн өнүгүүсүнө салым кошууну эңсейт, максат кылат.
Президент калайык-калкка, өлкөнүн ар бир атуулуна, сыртта жүргөн мекендештерге ден-соолук, ийгилик, бактылуу жана бакубат жашоо каалап, өлкөдөн өткөн дөөлөт болбой турганын, кыргыз мамлекети — баарынан жогору экенин белгиледи.
Ушул тапта Кыргыстандын ар тарабында кандай окуялар болуп жатканын Sputnik Кыргызстан агенттигинин тексттик трансляциясынан окуңуздар.
