Президенттин кызы Шагиева кош бойлуу сүрөтүн эмнеге жарыялаганын айтты

БИШКЕК, 6-мар. — Sputnik. Президент Алмазбек Атамбаевдин кызы Алия Шагиева кийимсиз турган кош бойлуу сүрөтүн эмне үчүн социалдык тармакка жарыялагандыгын Facebook социалдык тармагындагы баракчасына жазды. Алия анын сүрөтүнө сын-пикир айткандарга берүүчү жообун сарказм менен баштаган.

Шагиева сүрөттөргө карата комменатарийлердин аягына чыкчудай түрү жоктугун, андай сөздөрдү бир нече себептерден улам тоготпой тургандыгын айткан. Ал жазган текстинде аялдардын укугу корголушунун зарылдыгын, "патриархалдык коомчулуктун кемчиликтерин" айтып, бул боюнча эч кимди күнөөлөбөстүгүн болгону аң-сезимди жогорулатуу боюнча кыймылдоо керек деген. Андан сырткары, бул жазгандары диний фанаттарды безге сайгандай болорун жана алар толугу менен окубай туруп комментарий жаадырарынан күмөн санабастыгын айткан.

Сүрөттөрүмдү эмнеге койдум?

Коомчулукта кызуу талкуунун, ар кыл пикирлердин себеби болгон сүрөттөрүн эмнеге койгондугун түшүндүргөн.

Аялдын көкүрөгүн секс менен байланышкан объекти катары карабоо туурасында айтып, эмчек баланы эмизүү үчүн жаралган эмеспи деп жазган. Кийинки мезгилдери "эркектер эмчекти сексуалдык объектиге айлантып жиберип, аларга аялдар да ишенип, эми ал башкача кабылданып калды" деген оюн билдирген. Шагиева буга себеп катары бир нече учурларды санаган. Ага эне элдин арасында чүрпөсүн ачык эмизгенден тартынат, ал эми аялдар идеалдуу эмчектин ээси болушу үчүн пластикалык операцияларды жасатышат ж.б.

"Мен тилекке каршыбы же бактыга жарашабы жылаңачтанып эмчегимди ачык көрсөткөн эмесмин. Анда деле мага карата "сен шуркуядай көрүнөсүң" деген сөздөрдү уктум", — деп жазган.

Мындай сөздөр эмнегедир аялдарга карата гана колдонуларын айтып, бул боюнча өзүнүн пикирин билдирген.

"Менин денем — анын канчалык сексуалдуу экендигин талкуулай турган нерсе эмес. Эгерде аны жогоруда айтылгандай көрсөңөр, ал силердин баш ооруңар. Мен анда кош бойлуу болуп турам. Ал эми кош бойлуулук — секс же жөн эле эмес, ал эне болуу туурасында кабар берет", — деп бүтүргөн Шагиева өзүнүн пикирин.

Эске салсак, Алия Шагиеванын кош бойлуу турган сүрөттөрүн социалдык тармакка жарыялагандан кийин, коомчулукта ар кыл сөздөр айтылып, бир даары жерге түкүрсө, бир даары ал Алиянын өзүнүн иши экендигин билдиришкен.