БИШКЕК, 15-янв. — Sputnik. Мас абалында милиция кызматкеринин чекесин жара тепти делген ырчы кыз Алтынай Жайнакова милиция кызматкерлери аны койдой кордогондугун Sputnik Кыргызстан агенттигине билдирди.
Анткен менен Алтынай Жайнакова окуя башкача болгондугун айтып Sputnik Кыргызстан агенттигине өзүнүн версиясын баяндап берди.
"Жөн жерден токтотушту"
— Эч кандай мыйзам бузбай эле бара жаткам. Анан жанымдан Кайгуул милициясынын унаасы өтүп кетти. Көп узабай мени башка Кайгуул милициясы токтоткондо биринчи көргөн милиция кызматкерлери келип калышты. Тереземди түшүрүп, сүйлөшкөнчө унаамдын ачкычын алып коюшту. Унаа ошол учурда жолдун ортосунда токтоп турган эле. Ачкычты бергиле, унаадан документтеримди алып берейин десем 6-7 милиция мени мазакташты. Анан мен Кылыч Жолдошевге чалам дегенде коркуп кетиштиби, айтор, журналисттерди чакырып жиберишти.
"Кашы жарылган милиция кызматкеринен кечирим сурадым"
— Караңгы жактан мени кой жүктөгөндөй жүктөштү. Анан "буттарымды караба" деп каршылык көрсөтүп жатканымда бутум кашына тийип кетти. Эгер ал түз отурса бутум кашына жетмек эмес да. Ал менин үстүмөн арыз жазып, учурда маселе каралууда. Мен болсо байкеден кечирим сурап, дары дармектерин алып берейин дедим. Бирок ал жанындагы кесиптеши менен мени шылдыңдап туруп алды.
"Кылыч Жолдошевди тааныбайм"
— Негизи мен Кылыч Жолдошев менен тааныштыгым жок. Аны көргөн да эмесмин. Атын атасам коркуп кетеби деген ой менен гана айткам. Учурда ал кишиден кечирим сураган кайрылуу жөнөттүм.
"Мен соо болчумун"
"Видео атайын кыскартылып чыгарылган"
— Интернетке жарыяланган видео кыскартылып кетиптир. Дем ала албай, жардам сураган жерлеримди кесип салышыптыр. Милиция кызматкерлери мага карата күч колдонду деп арыз жазгам. Бирок каралбай калды. Учурда ата-энем, жакындарым колдоп жардам көрсөтүп жатат. Окуя мага чоң сабак болду.
