БИШКЕК, 1-июн. — Sputnik. Депутат Аида Салянова демилгелеген тойго чакырылуучу коноктун санын чектеген мыйзам долбоору Жогорку Кеңеште колдоо тапкан жок.
Аталган мыйзам долбоорго 70 депутат "каршы", 42 депутат "макул" деген добуш беришти.
Аталган мыйзам долбоору мамлекеттик жана муниципалдык кызматчылардын арасында үйлөнүү тойлорунда, үй-бүлөлүк салтанаттарда, аза күтүү каада-жөрөлгөлөрүндө ашыкча ысырапкорчулукка, шаан-шөкөткө жол бербөө максатында иштелип чыккан.
Мыйзам долбооруна ылайык, бешикке салуу жөрөлгөсү, ажыга баруучуларды узатуу жана туулган күн үй-бүлөлүк чөйрөдө майрамдалса, "Тушоо кесүү", "Сүннөт той" каадасы 100дөн ашпаган адамды чакыруу менен өткөрүлмөк. Кыз узатуу аземи 50дөн ашпаган адамды чакыруу менен чектелүүгө тийиш болчу. Ал эми эң ири той деп эсептелген үйлөнүү үлпөтү 150 мейман менен чектелмек.
