БИШКЕК, 16-сен. — Sputnik. ИИМдин маалымат кызматы Алмаз Сарыбаев кармалганын кабарлады.
Билдирмеге караганда, Сарыбаев бийликти күч менен басып алууга шектелип, Жазык кодексинин 309-беренесинин негизинде кармалган. Ал ички иштер башкы башкармалыгынын убактылуу кармоочу жайына киргизилди.
"Андан сырткары, сотко чейинки өндүрүштү тергөө учурунда күбө катары Жогорку Кеңештин мурдагы жана азыркы бир нече депутаты, мурда иштеп кеткен мамлекеттик кызматкерлер суракка алынган. Бүгүнкү күндө бул сотко чейинки өндүрүш боюнча дагы бир катар тергөө аракеттери жүргүзүлүүдө", — деп айтылат.
Буга чейин ушундай эле айып менен ички иштер министринин мурдагы орун басары Курсан Асанов колго түшүрүлгөн.
Алмаз Сарыбаев экономика илимдеринин доктору, профессор Айылчы Сарыбаевдин уулу. Ал Экономика жана финансы институтунун алдындагы Билим берүү жана карьера борборунун директору.
