БИШКЕК, 1-авг. — Sputnik. Мурдагы президенттин юридикалык иштер боюнча өкүлү Сергей Слесарев Алмазбек Атамбаевдин кримтөбөл Азиз Батукаевдин иши боюнча суракка чакырылышы тууралуу ИИМге сунуш берип, бирок терс жооп алганын кабарлады.
Маалыматка караганда, Слесарев ИИМдин тергөө кызматына "Мурдагы президентке берилчү суроолор жиберилсин, Атамбаев тергөөнүн купуялуулугун сактоо менен ИИМдин өзүнө жообун берип жиберет" деген сунуш менен кайрылган.
"31-июль күнү ИИМдин өкүлдөрү менен жолугушуп, алардан тетири жооп алдым. Алмазбек Атамбаевдин кол тийбестиги бар. "КР президентинин ишмердүүлүгүнүн кепилдиги тууралуу" мыйзамга ылайык, Атамбаев суракка чакырылып, тинтүүгө алынбайт, ага кылмыш иши козголбошу керек. Ал эми Жогорку Кеңештин экс-президентти макамынан ажыратуу боюнча 27-июндагы токтому Атамбаевдин кол тийбестигин алып салууга негиз боло албайт", — деди Слесарев.
Эске салсак, Жогорку Кеңеш Алмазбек Атамбаевди кол тийбестигинен ажыраткан. Башкы прокурор Өткүрбек Жамшитов парламенттеги депутаттык комиссия койгон алты күнөөнүн бешөө негиздүү экенин ырастап, бул боюнча өзүнүн корутундусун дагы билдирген.
Алардын ичинде кримтөбөл Азиз Батукаевдин мыйзамсыз бошотулушу боюнча дагы бар эле.
Азиз Батукаев 2006-жылы баңгизатты мыйзамсыз сактоо, жарылуучу заттарды жана курал-жаракты мыйзамсыз алып жүрүү, массалык башаламандык уюштуруу боюнча айыпталып, 16 жылга эркинен ажыратылган. 2008-жылы абак тартибин бузганы үчүн жаза мөөнөтүнө дагы эки жыл кошулуп, Нарындын №24 абагына которулган. Бирок 2013-жылдын 9-апрелинде оор дартка кабылганына байланыштуу делип бошотулуп, Кыргызстандын аймагынан Грозныйга учуп кеткен. 2014-жылдын 20-майында КР Жаза аткаруу мамлекеттик кызматы Батукаевге эл аралык издөө жарыялаган. ИИМдин маалыматы боюнча, учурда Батукаев курал-жарак сактаганы үчүн үч жылга эркинен ажыратылып, Чечен Республикасында жаза мөөнөтүн өтөп жатат.
2019-жылы апрелде башкы прокурор Өткүрбек Жамшитов ЖК жыйынында криминалдык авторитет Азиз Батукаевдин иши кайра жанданганын билдирген.
