БИШКЕК, 27-май — Sputnik. Кыргызстандын Улуу Британиядагы элчилигине Эдил Байсаловдун талапкерлиги сунушталып жатат. Бул тууралуу Жогорку Кеңештин Эл аралык иштер, коргоо жана коопсуздук боюнча комитетинен айтышты.
Ага ылайык, аталган комитетте 28-майдагы жыйынында Белоруссия менен Улуу Британияга сунушталган элчилердин талапкерлиги каралат. Белоруссияга Эрмек Ибраимовдун талапкерлиги сунушталууда.
Талапкерлерди комитетке тышкы иштер министри Чыңгыз Айдарбеков өзү тааныштырат.
Тышкы иштер министрлиги бул маалыматты тастыктаган да, четке каккан да жок.
Ушу тапта Улуу Британиядагы элчи кызматын Гүлнара Исакова аркаласа, ал эми Белоруссияда Кубанычбек Өмүралиев элчилик милдетти аткарган. Ал үстүбүздөгү жылдын март айында Түркияга которулган.
Белгилей кетсек, элчи төрт жылга дайындалат.
