БИШКЕК, 16 май — Sputnik. Экс-президенттин кол тийбестигин алуу мыйзамы Роза Отунбаевага да, Алмазбек Атамбаевге да иштейт. Бул тууралуу Sputnik Кыргызстан агенттигине документтин демилгечилеринин бири, депутат Исхак Масалиев билдирди.
Бүгүн, 16-майда, Сооронбай Жээнбеков "КР Президентинин ишмердигинин кепилдиктери жөнүндөгү" мыйзамга кол койду. Ага ылайык, экс-президенттин абсолюттук кол тийбестигин алып салууга жол ачылат.
"Мыйзам мурдагы президенттерге дагы иштейт", — деди Масалиев.
Эл өкүлү алгач кол тийбестик макамын толугу менен алып салууну сунуштаган. Бирок анын кесиптештери бир катар өзгөртүүлөрдү киргизип, мыйзам кабыл алынды. Анда 12-беренеге ("Кол тийбестик жөнүндө") өзгөртүүлөр киргизилди. Ага ылайык, экс-президент кол тийбестик статусунан ажырагандан кийин гана жоопко тартылат. Белгилей кетчү жагдай, мыйзамда экс-президенттин кол тийбестигин алуу учурдагы мамлекет башчысыныкындай эле татаал жоболор менен ишке ашырылары жазылган.
Кыргызстандын президенти кылмыш жоопкерчилигине кызматынан четтетилгенден кийин гана тартылышы мүмкүн. Эгер президенттин иштеп турган учурундагы аракеттеринде кылмыш белгилери болгону жөнүндө Башкы прокуратуранын корутундусу жана Жогорку Кеңеш тарабынан кылмыш жасагандыгы жөнүндө коюлган айып болсо, мамлекет башчы иштен алынат.
Мындан соң статусту алуу чечимин Жогорку Кеңештин депутаттарынын экиден үч бөлүгү колдоп бериши зарыл (айып коюлгандан кийин үч айдын ичинде).
Өзгөчө белгилей кетчү жагдай, документ дагы бир маанилүү норма менен толукталды: экс-президент саясий же мамлекеттик бийлик органдарында жетекчилик кызматтарды ээлей албайт. Ошондой эле саясий партиялардын башкаруу органдарында эмгектене албайт.
Эгер мурдагы президент бул нормаларга баш ийбей турган болсо, бардык артыкчылыктарынан кол жууйт.
