12:06 21 Жетинин айы 2019
Түз эфир
  • USD69.8500
  • EUR77.2506
  • RUB1.0910
ЖК депутаты Аскарбек Шадиев. Архив

Камактагы компанияларынын экөө эбак жоюлган. Шадиевдин мал-мүлкү тууралуу

© Фото / пресс-служба Жогорку Кенеша
Саясат
Кыскача шилтеме алуу
Аскарбек Шадиевге козголгон кылмыш иши (20)
143631

УКМКнын билдиришинче, Аскарбек Шадиев жана жакындары ага кылмыш иши козголгонго чейин айрым мүлкүн сатып, башкаларга кайта каттатууга жетишкен.

БИШКЕК, 5-июл. — Sputnik. Май айында Улуттук коопсуздук мамлекеттик комитети Аскарбек Шадиев менен анын жакын туугандарына таандык делген 12 компания менен беш турак жайды камакка алган болчу.

Алардын арасындагы жоопкерчилиги чектелген беш коомдун уставдык капиталынын 100 пайыз үлүшү Шадиевдерге таандык экени көрсөтүлгөн. Атап айтканда, "Боорсок плюс", "Тип-Топ", "Трейд Инвест", "Аква Инвест", "Союз Инвест" ишканалары. Андан сырткары, "Бената", "Карвен групп", "Ларель", "Аква Инвест плюс" жоопкерчилиги чектелген коомдордун уставдык капиталынын 50 пайызына дагы ээлик кылып келген. Эки компанияга — "Карвен четыре сезона", "Континенталь транс сервис" ЖЧКларында 33,33 пайыздан үлүшү бар.

Ал ортодо УКМК Аскарбек Шадиев жана анын жакындары мүлкүнүн бир бөлүгүн кылмыш иши козголгонго дейре, тагыраагы, 28-апрелге чейин эле сатып, башкаларга каттатып коюшканын билдирди. Маалыматта Финансылык чалгындоо кызматы депутаттын банктагы эсептерин камакка алгандан кийин Шадиевдердин 11-апрелден тарта айрым мал-мүлкүн сатып калууга үлгүргөнү айтылат.

Улуттук коопсуздук мамлекеттик кызматына Шадиевдерге таандык делген кайсы мал-мүлк сатылып, кайсынысы башкаларга каттатылганын сурап кайрылганыбызда учурда тергөө жүрүп жатканын жүйө келтирип, бул тууралуу маалымат тергөө аяктагандан кийин коомчулукка жарыялана турганын кабарлады.

Камакка алынган мүлктөрдүн таржымалы

100 пайыздык үлүшү Шадиевдерге таандык делген 5 компаниянын бири — "Трейд Инвест" ЖЧКсы 28-апрелге дейре кайра каттоодон өткөн. Атап айтканда, Юстиция министрлигинин сайтындагы маалымат боюнча курулуш долбоорлорун иштеп чыгуу менен алектенген "Трейд Инвест" ЖЧКсы 23-апрелде кайта каттоого алынганы айтылат. ЖЧКнын жетекчиси делип Ж.У.М., учредители катары В.Д.Ю аттуу жаран көрсөтүлгөн.

— "Боорсок плюс" ЖЧКсы 2017-жылы 15-декабрда кайра каттоодон өтүп, түрдүү товарларды дүңүнөн соодалай турганы жазылган. Ээси катары Н.Г.Ф. аттуу жаран көрсөтүлүп, учредителдердин арасында да Н.Г.Ф жана "Тип-Топ" ЖЧКсы көрсөтүлгөн. "Ачык бюджет" порталындагы маалымат боюнча ЖЧК 2016-жылы мамлекетке 26 368 сом салык төлөгөн.

— "Тип-Топ" ЖЧКсы негизинен түрдүү товарларды дүңүнөн сата турганы белгиленип, 2017-жылы 28-февралда кайра каттоодон өтүп, жетекчиси жана учредители катары Н.Г.Ф. аттуу жаран көрсөтүлгөн.

— "Аква Инвест" ЖЧКсы турак-жай жана киши жашабай турган имараттарды салуу менен алектенет. 2006-жылы 28-декабрда кайта каттоого алынган. Жетекчиси М.З.У. аттуу жаран болсо, учредители Ш.А.К. аттуу адам.

— "Союз Инвест" ЖЧКсы да турак-жай жана киши жашабай турган имараттарды салуу менен алектенет. Жетекчиси А.Д.А. аттуу жаран, учредители Ш.А.К. деген киши деп 2016-жылы 21-июлда кайра каттоодон өткөн. "Ачык бюджет" порталында эч кандай маалыматы жок.

Шадиевдердин 50 пайыз үлүшү бар делген төрт компаниянын экөө — "КАРВЕН груп" жана "Ларель" ЖЧКлары 28-апрелге чейин бир күндө кайра каттоодон өткөн.

— "KARVEN group" ("КАРВЕН груп") жоопкерчилиги чектелген коому 13-апрелде кайра каттоодон өтүп, жетекчиси катары Б.С.А. аттуу жаран көрсөтүлгөн. Ал эми учредители Б.Г.Г. экени жазылган. Сайтта бул компаниянын турак үй жана киши жашабай турган имараттарды курууга адистешкени көрсөтүлгөн. "Ачык бюджет" порталындагы маалыматка ылайык, компания мамлекеттик бюджетке 2017-жылы 2562 сом төлөсө, 2018-жылдын 1-июнуна карата 135 980 сом төлөгөн.

— "Ларель" жоопкерчилиги чектелген коому дагы 13-апрелде кайта каттоодон өтүп, ЖЧК жетекчиси катары Б.С.А. экени жазылган. Бул компания да турак үй жана киши жашабай турган имараттарды курууга адистешкен. Учредителдери Б.К.Г., Б.Г.Г. жана Б.Э.О. аттуу жарандар. "Ачык бюджет" порталындагы маалымат боюнча компания 2016-жылы бюджетке 900 (тогуз жүз) гана сом төлөгөн.

— "Бената" ЖЧКсы ишмердигин токтотту деп 2015-жылы 12-январда каттоого алынган.

— "Аква Инвест плюс" 2006-жылы 12-декабрда кайта каттоодон өтүп, жетекчиси деп М.З.Н аттуу жаран, учредителдери деп "Аква-инвест" менен "Бактуу-Долоноту айылындагы өнүгүү" коомдук фондусу көрсөтүлгөн. "Ачык бюджет" порталында ишкана тууралуу маалымат жок.

Шадиевдердин үлүшү 33,33 пайыз деген "Карвэн-четыре сезона" жоопкерчилиги чектелген коому 11-апрелде кайта каттоодон өткөн. ЖЧКнын жетекчиси катары С.В.И. аттуу жаран көрсөтүлгөн. Юстиция министрлигинин сайтындагы маалымат боюнча компания турак үй жана киши жашабай турган имараттарды курат. Учредителдери деп Б.Г.Г., К.В.А., Ш.С.А. жазылган. "Ачык бюджет" порталындагы маалымат боюнча компания мамлекеттик казынага 2017-жылы 187 072 сом төлөсө, 2013-жылдан бери жалпысынан 1 миллион 620 миң 835 сом которгон.

30 пайыздан ашык үлүшү бар делген "Континенталь транс сервис" ЖЧКсы ишмердигин токтотту деп 2009-жылы 10-апрелде каттоодон өткөн.

Юрист Кайрат Осмоналиевдин айтымында, мыйзам боюнча камакка алынган мүлктүн бардык активдери тоңдурулат. Башкача айтканда, компания мүлкүн сатып, аны алып чыгып кете албайт. Ошондой эле жаңы келишимдерди түзө албайт. Эгер тергөөгө эч кандай зыян келтирбесе иштей берет. Ал эми шек жаратса тергөөчүнүн өтүнүчү менен ишкана толук жабылышы мүмкүн.

Кандай учурда мекеме кайра мамлекеттик каттоодон өтөт?

Кыргызстандын "Юридикалык жактарды, филиалдарды (өкүлчүлүктөрдү) мамлекеттик каттоо жөнүндө" мыйзамынын 12-беренесине ылайык, эгер юридикалык жактар өзгөртүлүп түзүлсө, бөлүнүп чыкса, жоюлса, уставдык капиталдын өлчөмү, катышуучулардын үлүштөрү өзгөрсө, аталышы алмашса, уюштуруучулардын курамы өзгөргөндө, юридикалык жактын жайгашкан жери өзгөрсө (бир облустан экинчи облуска, же болбосо облустан Бишкек (Ош) шаарына жана тескерисинче) кайрадан каттоого алынат.

Эске салсак, мурдагы биринчи вице-премьер, Жогорку Кеңештеги "Бир Бол" фракциясынын депутаты Аскарбек Шадиевге карата үч берене боюнча кылмыш иши козголгон. Алар "кызматынан кыянаттык менен пайдалануу", "мамлекеттик чек араны мыйзамсыз кесип өтүү" жана "криминалдык жол менен табылган каражатты мыйзамдаштыруу" беренелери.

Тема:
Аскарбек Шадиевге козголгон кылмыш иши (20)

Тема боюнча

УКМК: Шадиевдин бүлөсү мүлкүнүн бир бөлүгүн иш козголгонго чейин сатып ийген
Суу кечип өткөн! Шадиев Кыргызстандан качан, кантип чыгып кеткенинин чоо-жайы
Белгилер:
байлык, кылмыш иши, Улуттук коопсуздук боюнча мамлекеттик комитети, Аскарбек Шадиев

ЭҢ МААНИЛҮҮ