БИШКЕК, 26-окт. — Sputnik. Кыргызстандын Тышкы иштер министрлиги чек арадагы кырдаал тууралуу казакстандык кесиптештеринин билдирүүсүнө жооп кайтарды.
26-октябрь күнү Казакстандын ТИМи Кыргызстан коомчулугу чек арадагы кырдаал боюнча туура эмес маалымат алган өңдүү деген пикирин билдирген.
Тышкы иштер министрлигинин расмий өкүлү Айымкан Кулукеева чек арадагы көзөмөлдү күчөтүү стратегиялык өнөктөштүктүн шарттарына жана ЕАЭБдин максаттарына туура келбестигин билдирди.
"Казакстан тарап ар бир жолкуда чек ара көзөмөлү күчөп жатканын ар башкча түшүндүрөт", — деп айтылат билдирүүдө.
Мисалы, 11-октябрь күнкү чек арадагы чектөөлөрдү Казакстандын коопсуздук комитети миграциялык мыйзамдардын бузулушун алдын алуу боюнча пландык иш-чаралар экенин айтканы менен ага чейин кыргыз тарапка бул тууралуу маалымат берилбегенин баса белгиледи.
Андыктан чек арадагы кырдаал боюнча Казакстан жана Кыргызстан элине туура эмес маалыматты казак тарап берип жатканы кошумчаланды.
