00:59 20 Аяк оона 2017
Түз эфир
Визит президента Узбекистана Шавката Мирзиёева в Кыргызстан

Атамбаев менен Мирзиёевдин жолугушуусу. Президенттер эмнелерди убада кылышты

© Пресс-служба президента КР / Султан Досалиев
Саясат
Кыскача шилтеме алуу
Шавкат Мирзиёевдин Кыргызстанга болгон сапары (12)
47020

Өзбек лидери жолугушуу учурунда бир топ талуу маселелер чечилгенин белгиледи. Президенттердин ортосунда эмне жөнүндө сөз болгонун Sputnik Кыргызстан агенттигинин материалынан окуңуз.

БИШКЕК, 5-сен. — Sputnik. 5-сентябрь күнү Кыргызстанга мамлекеттик сапары менен Өзбекстандын президенти Шавкат Мирзиёев келди. Сапардын алкагында эки өлкөнүн президенттери жолугуп, соңунда журналисттерге маек курушту.

Алмазбек Атамбаев ушу тапта тарыхый окуя болуп жатканын белгиледи.

“Бүгүн биз чек аранын 85 пайызын аныктоо боюнча келишимге кол койдук, эми болгону 15 пайызы калды. Эң башкысы — каалоо жана саясий эрк болсо бардык маселе боюнча кепке келүүгө болоруна ынандык”, —деди өлкө башчы.

Шавкат Мирзиёев бул чынында эле тарыхый күн экенине токтолду.

“25 жылдын аралыгында бир да чакырым жер аныкталбаптыр, бир жылга жетпеген убакытта 85 пайызы аныкталды”, — деди ал.

Буга чейин мамлекеттик чек аранын 1 170,53 чакырымы же 80 пайызы аныкталганы айтылган

Президент Кыргызстана Алмазбек Атамбаев в ходе встречи с главой Узбекистана Шавкатом Мирзиёевым, прибывшим в КР с государственным визитом
© Пресс-служба президента КР / Султан Досалиев
5-сентябрь күнү Кыргызстанга мамлекеттик сапары менен Өзбекстандын президенти Шавкат Мирзиёев келди

Өзбекстанга ээн-эркин кирип чыга алабызбы?

Жолугушуунун жүрүшүндө эки өлкө чек арасын ээн-эркин кесип өтүү маселеси көтөрүлдү. Атамбаев чек арадан өтүүнүн татаалдыгы Фергана өрөөнүнүн жашоочулары үчүн бир топ кыйынчылыктарды жаратып келерин белгиледи.

“Сүйлөшүү маалында биз бардык маселелер боюнча бир пикирге келдик. Октябрга деп болжолдонуп жаткан менин Өзбекстанга болгон сапарыма чейин бүгүнкү келишимдердин баарын ишке ашырууга аракет кылабыз. Бардык өткөрүү пунктулары ачык болуп, эл ары-бери эркин жүргүдөй болот. Чек ара пикир келишпестиктин эмес, достук менен ынтымактын булагы болушу керек”, — деди Атамбаев.

Өз кезегинде Мирзиёев дагы бул жааттагы аракеттер ишке ашарына ишендирип өттү. 

Президент Кыргызстана Алмазбек Атамбаев в ходе встречи с главой Узбекистана Шавкатом Мирзиёевым, прибывшим в КР с государственным визитом
© Пресс-служба президента КР / Султан Досалиев
Жолугушуунун жүрүшүндө эки өлкө чек арасын ээн-эркин кесип өтүү маселеси көтөрүлдү

Каршылаш тарапташка айланганда

Буга чейин Өзбекстан Нарын дарыясына ГЭС куруу демилгесине каршы чыгып келген. 

“Бүгүн биз суу жана ГЭС куруу маселеси боюнча макулдаштык. Алмазбек Шаршенович бир дагы станция Өзбекстандын катышуусуз курулбай турганына сөз берди”, — деди коңшу өлкө президенти.

Ал Өзбекстан аталган долбоорлорго каржы жагынан да, ресурс жагынан да колдоо көрсөтө турганын белгиледи.

“Камбар-Ата ГЭСин чогуу курабыз, ал бизге керек”, — деди Мирзиёев. 

Президент Кыргызстана Алмазбек Атамбаев в ходе встречи с президентом Узбекистана Шавкатом Мирзиёевым, прибывшим в КР с государственным визитом
© Пресс-служба президента КР / Султан Досалиев
Маалымат жыйын учурунда эки президент тең бири-бирин боордош атап, жылуу сөздөн аянышкан жок

Жан эргиткен жылуу сөз

Өзбекстандын президенти Шавкат Мирзиёев жана Кыргызстандын өлкө башчысы Алмазбек Атамбаев
© Пресс-служба президента КР / Султан Досалиев
Маалымат жыйын учурунда эки президент тең бири-бирин боордош атап, жылуу сөздөн аянышкан жок. 

Атамбаев акыркы жыл ичинде коңшу өлкөдө кескин өзгөрүүлөр болгонуна токтолуп, рфеформалар жүрүп жатканын, мындай ыргак менен Өзбекстан аймактын географиялык эле эмес, саясий да, экономикалык да борборуна айланарын баса белгиледи.

“Сиз Өзбекстан да, Кыргызстан да ондогон жылдар бою күтүп келген абдан прогрессивдүү лидерсиз. Саясий кеменгерлигиңиз үчүн ыраазычылык билдирем”, — деди Атамбаев.

Өз кезегинде Мирзиёев Атамбаев өлкө башында турган аз жыл ичинде Кыргызстандагы абалды жөнгө салуу боюнча бир топ аракеттер көрүлгөнүнө токтолду. Муну менен бирге Кыргызстандын ийгиликтерине Өзбекстан эле эмес, башка коңшу мамлекеттер да кубанып жатканын белгиледи.

Мирзиёевдин мамлекеттик сапары 6-сентябрь күнү соңуна чыгат.

Тема:
Шавкат Мирзиёевдин Кыргызстанга болгон сапары (12)

Тема боюнча

Өзбекстан президенти менен чек ара маселеси сүйлөшүлдү
Көптөн күткөн жолугушуу: Атамбаев өзбек президенти Мирзиёевди тосуп алды
Белгилер:
чек ара, Шавкат Мирзиеев, Алмазбек Атамбаев, Өзбекстан, Кыргызстан

ЭҢ МААНИЛҮҮ