БИШКЕК, 13-фев. — Sputnik. Президент Алмазбек Атамбаев анын чет өлкөдөгү мүлкү тууралуу депутат Өмүрбек Текебаевдин билдирүүлөрүн текшерип чыгып, мыйзамда каралган чараларды көрүүнү Башкы прокуратурага тапшырды. Бул тууралуу мамлекет башчынын маалымат кызматынан кабарлашты.
Билдирмеге караганда, Башкы прокурор Индира Жолдубаева текшерүүнүн жыйынтыктарын президент менен коомчулукка маалымдоого тийиш.
"Алмазбек Атамбаев "Ата Мекен" фракциясынын лидери Өмүрбек Текебаевдин Кипрден мамлекет башчысынын мүлкү боюнча материалдарды "тапканы" тууралуу айрым жалпыга маалымдоо каражаттарына жарыялаган билдирүүлөрүн текшерүү тапшырмасын Башкы прокуратурага жүктөдү", — деп айтылат маалыматта.
Мамлекет башчы текшерүүнүн жыйынтыгы чыккандан кийин мыйзамда каралган бардык чараларды көрүү тапшырмасын Башкы прокурор Индира Жолдубаевага тапшырган.
