ОШ, 27-окт. — Sputnik. ОшМУ менен Анжиян мамлекеттик университетинин ортосунда кызматташуу боюнча Меморандумга ректорлор — Каныбек Исаков менен Икрамжон Юлдашев кол коюшту. Мындай аракет өзбек делегациясынын Кыргызстанга болгон сапарынын алкагында жасалды.
Анжиян мамлекеттик университетинин ректору Юлдашев мындан ары тажрыйба алмашуу жана билимди өркүндөтүү жаатында кызматташуу болорун билдирди.
Ал эми биринчи вице-премьер Мухамметкалый Абулгазиев ушул жылдын соңуна чейин Бишкек шаарында кыргыз-өзбек өкмөт аралык комиссиясынын отуруму өткөрүлө турганын билдирип, анда соода-сатык мамилесин өнүктүрүү жаатында сүйлөшүүлөр болорун айтты.
Абулгазиев кыргыз-өзбек улутунун ортосуна от жаккысы келгендерге мүмкүнчүлүк бербеш керектигин белгиледи.
"Биз бир тууган элбиз. Кыргыз-өзбек эли кылымдардан бери кыз алышып, кыз беришип куда-сөөк болуп келген. Миң жылдык достугубуз улана берет", — деди ал.
Ал эми төкмө акын Идирис Айтибаев кыргыз-өзбек тилинде достукка, ынтымакка үндөп төгүп ырдады. Өзбекстандан келген делегация ОшМУнун медицина факультети менен таанышты. Конокторду аталган факультетте окуган 26 мамлекеттен келген улуттун өкүлдөрүнөн турган студенттер тосуп алышты. Факультеттин аймагында кыргыз күүлөрү чертилип, өзбек тилинде ырлар ырдалды.
Ал эми индиялык студент кыз-жигиттер "Кыргыз бийин" бийлеп, конокторго өз өнөрлөрүн тартуулашты.
