БИШКЕК, 1 авг — Sputnik. Өлкө башчы Алмазбек Атамбаев маалымат жыйында Түркиянын тышкы иштер министри Мевлют Чавушоглунун билдирүүсү тууралуу пикирин айтты.
Эске сала кетсек, Чавушоглу эки ирет ЖМК аркылуу Кыргызстанда гуленчилер төңкөрүш жасоого аракет кылып жатканын белгилеп, абал коркунучтуу экенин айткан эле.
Ал эми КРдин Тышкы иштер министрлиги бул билдирүүгө жооп берип, көзкарандысыз мамлекеттин ички ишине кийлигишүү туура эмес экенин айткан.
"Бул акылга сыйбаган нерсе. Эгер ушунчалык акылдуу болсо өздөрүндө эмнеге мындай "төңкөрүшкө" жол беришти. Албетте, бардык кеңешти угуп, маалыматтарды текшеребиз. Бизди коркутуп, же акыл үйрөтүүнүн кажети жок", — деди Атамбаев.
Белгилей кетсек, 16-июль күнү Түркияда төңкөрүш жасоого аракеттер болуп, бир канча адам каза болгон.
