БИШКЕК, 5-фев. — Sputnik. Кыргызстандын Жогорку соту октябрда жана январь айында депутаттарды мандаттан ажыратуу боюнча чыгарган эки башка чечимине түшүндүрмө берди.
Октябрь айында КР Жогорку сот "Республика – Ата-Журт" партиясынын депутаттары Аида Исмаилова, Курманкул Зулушев, Жыргалбек Саматов, Алиярбек Абжалиев, Рада Туманбаева, Закира Шарапованы Жогорку Кеңештин депутаттыгына талапкерлердин тизмесинен чыгаруу боюнча БШКнын чечимин мыйзамсыз деп тапкан.
Жогорку сот бул эл өкүлдөрүнүн арызы парламенттик шайлоого чейин, тактап айтканда 2015-жылдын 4-октябрына чейин жазылганын аныктаган. "Республика – Ата-Журт" партиясынын өкүлдөрү дагы депутаттыкка талапкерлер арызды партиянын съезди болгонго чейин жазышканын тастыктаган. Маалым болгондой талапкерлердин тизмеси партиянын съездинде бекитилип, БШКдан талапкер катары катталат, деп айтылат Жогорку сот тараткан билдирүүдө.
Андыктан талапкерлердин арызы "КР президентин жана КР Жогорку Кеңешенин депутаттарын шайлоо жөнүндөгү" мыйзамды бузуу менен кабыл алынгандыктан Жогорку сот БШКнын чечимин мыйзамсыз деп тапкан.
Ал эми Жогорку соттун жарандык иштер боюнча коллегиясы 2016-жылы 21-январда Жогорку Кеңешке "Кыргызстан" партиясынан депутат болуп келген Чолпон Эсенаманова менен Элмира Жумалиева мөөнөтүнөн мурда мандатынан ажыратуу боюнча БШКнын чечимин туура деп таап, аны күчүндө калтырган.
2015-жылы 21-декабрда аталган депутаттар "Кыргызстан" фракциясынын лидерине фракциянын катарынан чыгуу тууралуу арызын жазган. 22-декабрда фракция эки депутатты – Элмира Жумалиева менен Чолпон Эсенаманованы өз катарынан чыгаруу боюнча чечим кабыл алган. Бул чечимдин негизинде 2016-жылы 11-январда Борбордук шайлоо комиссиясы депутаттарды мандатынан ажыраткан.
Мандаттан ажыраган депутаттын жактоочулары жазылган арыздар алар эл өкүлү болуп келгенге чейин жазылганын тастыктап, кат түрүндө далилдеп бере алышкан эмес деп жазылат Жогорку сот тараткан билдирүүдө.
