БИШКЕК, 3-фев. — Sputnik. "Кыргызстан" саясий партиясынын тизмеси боюнча депутат болуп келген Урматбек Самаев, Алмазбек Токторов жана "Ата Мекен" саясий партиясынын тизмеси менен депутат болгон Абдимуктар Маматов бүгүн ант берди.
Белгилей кетсек Борбордук шайлоо комиссиясы "Кыргызстан" саясый партиясынын парламенттеги фракциясынын чечиминин негизинде депутаттар — Элмира Жумалиева менен Чолпон Эсенаманованы мандатынан ажыраткан. Аталган эл өкүлдөрү мындай чечим менен макул эместигин билдирип, Бишкек шаарынын Биринчи Май райондук сотуна кайрылган. Райондук сот БШКнын чечимин мыйзамсыз деп тапкан. БШК райондук соттун чечимине макул эместигин билдирип, Жогорку сотко кайрылган. Өз кезегинде Жогорку сот Биринчи Май райондук соттун чечимин жокко чыгарып, БШКнын чечимин күчүндө калтырган.
Жогорку Кеӊештин төрагасы Асылбек Жээнбеков жалпы депутаттардын атынан жаңы эл өкүлдөрүн ант берүү аземи менен менен куттуктап, алардын депутаттык ишине ийгиликтерди каалады.
"Кыргыз Республикасынын Жогорку Кеӊешинин депутатынын статусу жөнүндө" мыйзамдын жоболоруна ылайык, ЖК депутаты парламентте ант бергенден тартып өз ыйгарым укуктарын расмий түрдө аткарууга киришет.
