БИШКЕК, 14-мар. — Sputnik. Кыргыз-тажик чек арасында кайрадан жергиликтүү тургундар ортосунда чыр чыкты. Бул тууралуу Мамлекеттик чек ара кызматынан кабарлашты.
Эл бири-бирине таш ыргытып, тажикстандыктар кыргыз жаранынын жашабаган эски үйүн өрттөшкөн.
Чек ара кызматынын билдирүүсүнө ылайык, болжол менен саат 16:10 чамасында чек аранын жанында жашаган эки өлкөнүн жергиликтүү тургундары бири-бирине таш ыргытып, бир адам жабыркаган.
"Эки өлкөнүн тең чек арачылары абалды жөнгө салып, элди чек арадан четтетүү максатында абага ок чыгарышты. Чек арадан өтүү азыр мүмкүн эмес. Күч органдары түшүндүрүү иштерин жүргүзүүдө", — деп жазылат маалыматта.
Учурда окуя болгон жерде кырдаалды жөнгө салуу максатында Кыргызстандын вице-премьер-министри Жеңиш Разаков жана Тажикстандын премьер-министринин орун басары Иброхим Азим жүрөт.
