БИШКЕК, 13-сен. — Sputnik. "Дүйнө сулуусу" наамынын ээси Сания Шакирова каза болгон кырсыкка себепкер машинанын айдоочусу 31 жаштагы Чыңгыз Кондурбаев Ысык-Көл облустук сотунун чечими менен 10 жылга жатак абагына кесилди. Бул тууралуу Sputnik Кыргызстан агенттигине жабыркаган тараптын жактоочусу Рустам Абдурауфов кабарлады.
Айдоочунун кырсык болгон учурда мас экени аныкталып, эки айга камакка алынган.
Ал эми Ички иштер министрлиги унаанын айдоочусу ИИМдин Атайылаштырылган коргоо кызматынын башкы башкармалыгынын Октябрь району боюнча мурдагы жетекчиси Азрет Кондубаевдин уулу экенин да тастыктаган.
Жактоочунун айтымында, бүгүн бул иш боюнча акыркы соттук жараян өттү.
"10 жыл бул жакшы эле убакыт. Мындан сырткары, сот "Чыңгыз Кондурбаев Саниянын апасына эки миллион сом компенсация төлөп берсин" деген чечим чыгарды. Ошондой эле соттолгон адам үч жылга чейин унаа айдоо укугунан ажыратылды", — деди Абдурауфов.
Жабыркаган тараптын жактоочусу буга чейин Кондурбаев ичип алып рулга отургандыгын сотто моюндаганын айткан. Ошондой эле ал төрт миллион сомду төлөөдөн баш тартып, бирок Шакированын балдарын карап турууга макул экенин билдиргенин кошумчалаган.
Ал эми Сания Шакированын апасы Насиба Мамбеталиева соттун акыркы чечимине канааттанганын билдирди.
