Баткенде кыргыз-өзбек чек арасындагы чырдан бир адам ооруканага түштү. Чоо-жайы

© AP Photo / Eric GayЧек ара. Архив
Чек ара. Архив - Sputnik Кыргызстан
Жазылуу
Окуя 9-апрель күнү Сох дарыясындагы "Ширеч" насостук станциясында болгон.

БАТКЕН, 11-апр. – Sputnik. Өзбекстандын Сох анклавы менен чектешкен Баткен облусунун Суу-Башы айыл өкмөтүндөгү кыргыз-өзбек чек арасында чыр чыгып, бир жергиликтүү жашоочу ооруканага түштү. Бул маалыматты өкмөттүн Баткен облусундагы өкүлчүлүгүнүн маалымат катчысы Чолпон Бердикулова тастыктады.

Анын айтымында, окуя 9-апрель күнү саат 14:00дө чамасында Сох дарыясындагы "Ширеч" насостук станциясында болгон.

Чек арачы. Архив - Sputnik Кыргызстан
КР жаранынын атылышы: кыргыз-өзбек чек ара кызматтарынын башчылары Ташкентте жолукту
"Аталган насостук станцияга келген төрт өзбек жараны менен станциянын күзөттө турган жергиликтүү жашоочу Адимжан Мансуровдун ортосунда чыр чыгып, мушташка айланган. Күзөтчү алган жараатынан улам Сох районунун ооруканасына жеткирилген. Ал эми окуя болгон жерге ошол замат милиция кызматкерлери жана жергиликтүү бийликтин өкүлдөрү барып, кырдаалды көзөмөлгө алышкан. Жабыркаган Мансуров Сох ооруканасынан Баткен облустук ооруканасына которулду. Окуя болгон жерге жергиликтүү эл чогулган жок, ок чыккан эмес", — деди Бердикулова.

Ал ошондой эле күзөттө турган Мансуровго кол көтөргөн Өзбекстандын жарандары Сох районунун милиция кызматкерлери тарабынан кармалып, учурда тергөө иштери жүрүп жаткандыгын кошумчалады.

"Баткен районунун акими Кеңеш Салихов менен Өзбекстандын Сох районунун башчысы Фарух Ганиев жана күч түзүмдөрүнүн жетекчилери жолугушуп, эки тарап тең чек аралаш аймакта жашаган жергиликтүү элди тынчтыкка чакырып, түшүндүрүү иштерин жүргүзүштү", — деди Бердикулова.

Ал Сох райондук милициясы тергелип жаткан иш боюнча Баткен райондук прокуратурасына жана ички иштер башкармалыгына маалымат бериле тургандыгын айтты.

Жаңылыктар түрмөгү
0