БИШКЕК, 27-фев. — Sputnik. Казакстандын КТК телеканалы Жогорку Кеңештин депутаты Дамирбек Асылбек уулунун кармалышынын чоо-жайын жарыялады.
Колго түшкөн трансулуттук кылмыштуу топтун мүчөлөрү жасаган иштерин моюнга алып көрсөтмө берүүдө. Топтун мүчөлөрү ишкер-импортерлордон акча алып турганы, акча берүүдөн баш тарткандарынын товары чек арада көпкө туруп, же такыр эле жоголуп кетип турганы айтылды.
"Жаркент" көзөмөл-өткөрүү пунктунун кызматкери Галым Сергалиевдин айтымында, "Жаркентте" иштеген мамлекеттик кирешелер департаментинин тогуз кызматкеринин ар бири смена сайын миллион теңгеден ашык алып турган.
Ушул эле көзөмөл өткөрүү пунктунун башка кызматкери жетекчилер бажыдагы коррупцияга көңүл бурбагыла деп айтканын, бир нерсе чыкса ордуна башкаларды алып келем деп коркутканын кошумчалады.
"Жүргүнчүлөр өтчү жерден бандиттер миллиондоп акча жасаган, ал эми жүк өтө турчу жерден тапкан акчаларына сан жетпейт. Бул акчага хан сарайлар салынып, кымбат машиналар алынган. Айрымдары асыл тукум жылкы кармоочу сарай да курууга жетишкен. Кармалгандардын ичинен Жогорку Кеңештин депутаты Дамирбек Асылбек уулу жакшы жашаган. Ал бардык аткезчилик түзүмдөрдүн башында турган", — деп айтылат маалыматта.
Кыргызстандык депутат Алматыдагы ресторандардын биринде бишкектик ишкер Уланбек Мурадилов жана казакстандык чек арачы Эмилбек Көчөрбаев менен чогуу отурганда кармалганы айтылат.
Эске салсак, 15-16-февраль күндөрү Казакстандын күч органдары коррупцияга каршы жүргүзгөн операцияда тогуз бажы постунда мыйзамсыз аракеттерди жүргүзгөн сегиз кылмыштуу топ жок кылынган. Кармалгандардын ичинде Кыргызстандын үч жараны болгон, алардын бири ЖК депутаты Дамирбек Асылбек уулу болгонун ТИМ тастыктаган.
Ал эми Дамирбек Асылбек уулу Казакстандын жараны экени айтылган нота Кыргызстандын Тышкы иштер министрлигине келип түшкөн.
