БИШКЕК, 18-дек. — Sputnik. Мамлекеттик мүлк фондунун башчысы Дүйшөнбек Зилалиев дүйшөмбүдө Улуттук коопсуздук мамлекеттик комитетине чакырылган. Бул тууралуу маалыматты УКМКдан да тастыкташты.
13 Бештин айы 2017, 16:51
Зилалиев Сооронбай Жээнбековдун инаугурациясында бомба коюлду делген маалымат боюнча суракка алынган. Башка маалыматтар азырынча айтыла элек.
Инаугурация күнү укук коргоо органдарынын кызматкерлери Чыңгыз Айтматов проспектиси менен Москва көчөлөрүнүн кесилишинен жарылуучу каражатты издешкен. ИИМ Академиясынын курсантынын айтымында, ага бомба тууралуу маалыматты Зилалиев маалымдаган.
Мүлк фонду болсо ведомствонун жетекчиси өкмөттүк трассадан өтүп баратып курсант кыздын формасын сындаганын билдирген.
"Ал кыз жакшы укпай калып, башкача түшүнүп алган болсо керек", — деп фонддон маалымдашкан.
УКМК кылмыш ишин Зилалиевге карата эмес, жалган маалымат фактысы боюнча козгогону маалыматта белгиленет.
