БИШКЕК, 16-июн. — Sputnik. Кетип бара жаткан айдоочуну токтотуп, аны менен кайым айтыша кеткенден кийин телефонун тартып алган Кайгуул милиция кызматкеринин видеосу жана аудиосу пайда болду. Аны милиционер менен уруша кеткен Таалай Жунушов аттуу колдонуучу Facebook баракчасына өзү жазган.
Жунушов инспектор сүйлөшүү жазылып калганын билгенден кийин деле коркутуусун улантканын айтууда.
"10-бөлүмдү чакырам, жаныңа бир нерсе таштатып коем деп коркута баштады. Эгер видеону өчүрбөсөм Ички иштер бөлүмүнө алып барып ошол жактан териштирүү болорун айтты. Менин макул болбогонумду көргөндөн кийин табелдик куралып алып чыгып, өлтүрөрүн айтып, мушташууну сунуштады. Мен унаадан окчун барып, "102" кызматын чакырууга аракет кылдым. Милиционер менин бирөөгө чалып жатканымды көрүп машинасына отурган бойдон кетип калды", — деди Жунушов.
Ал бул факты боюнча прокуратура менен ИИМге арыз жазарын белгиледи.
Чүй облустук Кайгуул милиция башкармалыгынын маалымат кызматы ички териштирүү иштерин баштаганын билдирди. Жетекчилик окуя жеке көзөмөлгө алганын айтып, аталган кызматкер көптөн бери иштеп келерин, мүнөзү токтоо экенин кошумчалады.
