БИШКЕК, 6-апр. — Sputnik. Улуттук коопсуздук мамлекеттик комитети ИИМдин өздүк коопсуздук кызматы менен биргеликте участкалык милиционерди колго түшүргөнү тууралуу УКМКнын маалымат кызматынан билдиришти.
Буга чейин соцтармактарга Бишкек шаарынын Жаш Гвардия бульвары менен Чүй проспектисинин кесилишинде милиция кызматкери кармалганы боюнча маалыматтар жарыяланган.
Укук коргоочулардын иш-аракетин телефондун камерасына тартып алган күбө аны Sputnik Кыргызстан агенттигине Whats App каналы аркылуу жиберген.
УКМК бул фактыны тастыктап, Ленин РИИБдин кызматкери кармалганын билдирди.
Маалыматка караганда, милиция кызматкери Башкы прокуратура тарабынан козголгон кылмыш ишинин (Кылмыш жана жаза кодексинин 313-беренеси "Пара талап кылуу") алкагында колго түшүрүлдү.
Учурда ыкчам иликтөө иштери жүргүзүлүүдө.
