БИШКЕК, 26-июнь — Sputnik. УКМКнын кызматкерлерине куралдуу каршылык көрсөткөн казактар эки башка колониядан качып чыгышкан.
Бейшемби күнү кечинде ИИМ Токтогул менен Киев көчөлөрүн жаап, кылмышкерлерди кармоо үчүн "Сирена" планы өтүп жатканын билдирген.
Маалыматка ылайык, 25-июнь күнү саат 16.25те Киев жана Исанов көчөлөрүнүн кесилишинде ыкчам-издөө иш аракеттер жүргөн, себеби, издөөгө алынган Казакстандын эки жарандын жайгашкан жайы аныкталган. Кармоо учурунда жарандардын бири ок чыгарып, экинчиси гранатаны жардырам деп коркуткандан кийин белгисиз тарапка из суутуп кетишкен. Шаар боюнча колго түшүрүү планы жарыяланган.
Буга чейин укук коргоо органдары Казакстандын жарандары кармалганын билдиришкен. УКМКнын расмий өкүлү Рахат Сулайманов аталган маалыматты четке кагып, издөө аракеттери улантылып жатканын белгилеген.
Мамлекеттик жаза аткаруу кызматынын маалыматы боюнча, чек араны мыйзамсыз кесип өткөнү жана документ жасаганы үчүн 1991-жылкы Абхин Альберт Сатыбалды уулу төрт, 1988-жылы туулган Амиров Жанболот Булатулы төрт жылга эркинен ажыраган.
Учурда издөө иштери улантылууда.
