БИШКЕК, 7-апр. — Sputnik. Ишкерлик субъектилерди текшерүүгө киргизилген мораторийдин мөөнөтү дагы бир жылга жылдырылды. Бул тууралуу вице-премьер Эркин Асрандиев брифинг учурунда айтты.
Эске салсак, мындай ченемди өкмөт 2019-жылдын 1-январынан тарта киргизип, ал 2021-жылдын 1-январына чейин иштемекчи болгон.
"Учурдагы түзүлгөн эпидемиологиялык кырдаалдан улам жана ишкерлерди колдоо максатында мамлекеттик көзөмөлдөөчү органдардын текшерүүсүнө киргизилген мораторий дагы бир жылга узартылды. Ошону менен 2021-жылдын аягына чейин бир дагы мамлекеттик көзөмөлдөөчү орган бизнестерди текшере албайт, ага укугу жок", — деди Асрандиев.
Мораторий текшерүүгө алган 10 мамлекеттик органга тийиштүү:
- Социалдык фонд;
- Монополияга каршы жөнгө салуу мамлекеттик агенттиги;
- Мамлекеттик отун-энергетика комплексин жөнгө салуу агенттиги;
- Финансы рыногун тескөө жана көзөмөлдөө мамлекеттик кызматы;
- Ветеринардык жана фитосанитардык инспекция;
- Экологиялык жана техникалык коопсуздук боюнча мамлекеттик инспекция;
- Финансы министрлигинин алдындагы баалуу металлдар боюнча департамент;
- Саламаттык сактоо министрлигинин алдындагы Дары-дармек менен камсыздоо жана медициналык техника департаменти;
- Саламаттык сактоо министрлигинин алдындагы Оорулардын алдын алуу жана мамлекеттик санитардык-эпидемиологиялык көзөмөл департаменти;
- Айыл чарба, тамак-аш өнөр жайы жана мелиорация министрлигинин алдындагы этил спиртин, алкоголдук жана курамында спирти бар продукцияны өндүрүү жана сатууну көзөмөлдөө башкармалыгы.
