БИШКЕК, 11-май — Sputnik. Кыргызстандын Өзбекстандын Сардобин суу сактагычындагы дамбанын жарылуусунан жабыркаган өзбек элине көрсөткөн гуманитардык жардамы жеткирилди. Бул тууралуу Тышкы иштер министрлиги кабарлады.
Бүгүн, 11-майда, Сырдарья облусунун Янгиер темир жол станциясында президент Сооронбай Жээнбековдун демилгеси менен жиберилген гуманитардык жүктү тапшыруу аземи болуп өттү.
Иш-чарага Кыргызстандын Өзбекстандагы элчиси Ибрагим Жунусов, Сырдарья облусунун акими Гофуржон Мирзаев, акимиаттын өкүлдөрү, облустук ЖМКлар жана аксакалдар катышканы айтылат.
"Элчи Ибрагим Жунусов оор учурларда кыргыз-өзбек эли ар дайым бири-бирине жардамга кол сунганын белгилеп, бүгүнкү берилип жаткан жардам дагы Өзбекстанга колдоо болот деген үмүтүн билдирди. Ошондой эле ал кырсыктан кийин тезирээк калыбына келүүнү каалады. Сырдарья облусунун акими Кыргызстандын мамлекет жетекчилигине жана боордош кыргыз элине терең ыраазычылык билдирди", — деп айтылат маалыматта.
Эскерте кетсек, 1-май күнү Өзбекстандагы Сардобин суу сактагычындагы дамбанын бир бөлүгү жырылган. Мындан улам коңшу өлкөдө 70 миңге чукул адам коопсуз жайга көчүрүлгөн. Кырсыкка кабылган 56 адам жабыркап, 2 киши каза тапкан.
Ал эми 2-май күнү суунун агымы Казакстандын Түркстан облусуна жеткен. Буга байланыштуу казак өкмөтү 31 миңден ашык айыл тургунун эвакуациялады.
