БИШКЕК, 9-ноя. — Sputnik. Өзбек-тажик чек арасындагы бекетке кол салууну "Ислам мамлекети" террордук уюму уюштурганын моюнга алды. Бул тууралуу AFP маалымат агенттиги тыюу салынган уюмдун көзөмөлүндөгү ЖМКларга шилтеме кылып жазып чыкты.
"Ислам мамлекети" террордук уюму кол салуу бир нече саатка созулуп, согушкерлердин бардыгы көз жумуп, тажик тараптан 10 адам набыт болгондугун билдирген.
Ошол эле маалда террордук уюм өзүнүн согушкерлеринин санын жана кайсы өлкөдөн экендигин көрсөткөн эмес.
Мындан сырткары, алар бет кап кийген алты адамдын кара желектин алдында ант берген видеосун да чыгарган.
Белгилей кетсек, 6-ноябрга караган түнү 20га чукул куралчан согушкер тажик-өзбек чек арасындагы "Ишкобод" бекетине кол салып, беш автоматты алып кетишкен.
Күч структураларынын операциясы маалында 15 согушкер жок кылынып, дагы бешөө колго түшүрүлгөн.
Атышуудан бир чек арачы менен бир милиционер каза тапты. Кийинчерээк кол салган согушкерлер "Ислам мамлекети" террордук уюмунун мүчөлөрү экени аныкталган.
