БИШКЕК, 24-апр. — Sputnik. Бишкекте өзгөчө ири өлчөмдөгү алдамчылыкка шектелген жаран кармалганын шаардык милиция маалымдады.
Ага ылайык, 23-январда М.М. аттуу жаран милицияга арыз менен кайрылып, белгисиз адамдар өздөрүн УКМКнын, ИИМдин жана Улуттук банктын кызматкерлери катары тааныштырып, алдап кеткенин билдирген.
Жабырлануучунун айтымында, шектүүлөр психологиялык басым көрсөтүп, коркутуп, башка адамдар менен байланышууга тыюу салышкан. Натыйжада алардын таасирине кирип, 9 миллион 123 миң сомункоторуп берген.
Бул факт боюнча алдамчылык беренеси менен кылмыш иши козголгон. Ыкчам-издөө иш-чараларынын жүрүшүндө 35 жаштагы Ж.И. кармалып, убактылуу кармоочу жайга киргизилди.
Ошондой эле тергөөнүн алкагында дагы беш адам аныкталып, ички иштер органдарына жеткирилген. Учурда тергөө амалдары уланууда.