БИШКЕК, 21-апр. — Sputnik. ИИМдин Баңгизаттарды мыйзамсыз жүгүртүүгө каршы күрөш кызматынын бөлүм башчысы жана оперативдүү кызматкери кармалганын УКМК билдирди.
Алар опузалап пара талап кылууга шектелип жатат.
Кызматкерлер Россиянын жаранынан кылмыш иши боюнча жазаны жеңилдетүүгө көмөк көрсөтүү үчүн 9 миллион рубль (болжол менен 100 миң доллар) талап кылган дешти. Тергөөнүн жүрүшүндө шектүүлөр акчаны түз албай, чет элдик банк эсептери аркылуу бөлүп которуу схемасын колдонгону аныкталган. Акча "Сбербанктагы" карталарга үчүнчү жактар аркылуу түшүп, кийин накталанып, Кыргызстандын аймагында мыйзамдаштырылган.
17-апрелде бөлүм башчы П.М. жана ыкчам кызматкер А.А. кармалып, УКМКнын убактылуу кармоочу жайына киргизилген. Мындан сырткары, ишке тиешеси бар башкаларды аныктоо боюнча иликтөө жүрүп жатканы айтылды.