БИШКЕК, 7-апр. — Sputnik. Бишкекте итке таланган баланы ооруканага жеткирген милиционер Тимурлан Кулназаров сыйланды. Бул тууралуу Жогорку Кеңештин маалымат кызматы билдирди.
Ага ылайык, парламент төрагасы Марлен Маматалиев ИИМдин Кайгуул-күзөт кызматынын туристтик ротасынын командири Кулназаровго Жогорку Кеңештин атынан Ыраазычылык кат тапшырды. Төрага ыраазычылыгын билдирип, мындай каармандыгы менен айырмаланган кызматкерлер көпчүлүккө үлгү экенин кошумчалады.
Тергөө кызматкерлеринин кесиптик күнүнө карата тармакта үзүрлүү эмгектенип келе жаткан алдыңкы кызматкерлер менен жолугушууга вице-спикер Болот Ибрагимов менен депутат Сүйүнбек Өмүрзаков да катышты. Алар кызматкелерге Жогорку Кеңештин атынан Ардак грамота жана Ыраазычылык каттарды тапшырып, мындан аркы иштерине ийгиликтерди каалады.
Эске салсак, 1-апрелде Бишкектин түндүк тарабындагы Алтын-Казык конушунда иттер алты жашар баланы талаган. Алар бөбөктүн баш терисин сыйрып, колу-бутун тиштеп салган. Окуянын кесепетинен бала оорукананын жандандыруу бөлүмүнө түшкөн.
Командир кызматтык милдетин аткарып жатып, каргашадан кийин бөбөктү дарыгерлерге жеткирген.