БИШКЕК, 3-апр. — Sputnik. Бишкекте 25 жаштагы жигитти коюп кеткен Lexus 460 унаасынын айдоочусуна кылмыш иши козголду. Шаардык милиция жолтандабастын 25 жаштагы айдоочусу убактылуу кармоочу жайга киргизилгенин билдирди.
Ага Кылмыш-жаза кодексинин 312-беренесинин ("Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу") 3-бөлүгү (Этиятсыздыктан өзгөчө оор залал келтирген ошол эле жосун) менен кылмыш иши козголду. Унаасы айып короого киргизилип, тиешелүү экспертизалар дайындалды.
Каргаша 3-апрелге караган түнү Аалы Токомбаев көчөсүндө болгон. Lexus автосунун айдоочусу катуу ылдамдыкта баратып, алгач жөө өтмөктөгү кишини өткөрмөкчү болуп токтогон Honda Fit автокөлүгүн артынан сүзүп, андан соң жөө адамды койдуруп кеткен. Андан кийин жолдун жээгинде токтоп турган дагы эки автоунаага урунуп барып, токтогон. Жолдон өтүп бараткан 25 жаштагы жигит окуя болгон жерден каза тапкан.