БИШКЕК, 1-дек. — Sputnik. Жогорку Кеңешке шайлоо жакшы деңгээлде өттү. Бул тууралуу КМШ Парламенттер аралык ассамблеясынын башкы катчысы Дмитрий Кобицкий билдирди.
Ал 36,9 пайыздык катышууну "жетиштүү деңгээл" деп атап, бул көрсөткүч мурдагы парламенттик шайлоолорго (34 пайыз) салыштырмалуу жакшы экенин белгиледи.
"Шайлоо участкалары билим берүү же саламаттык сактоо мекемелеринде гана эмес, базарларда, вокзалдарда, аэропорттордо жана башка жерлерде уюштурулгандыктан добуш берүүдө адамдарга ыңгайлуу болду", — деди Кобицкий.
Ал ошондой эле жарандарды шайлоого келбегени үчүн айыпка жыгуу ашыкча экенин, ар бир өлкө добуш берүүнү кызыктуу кылуу үчүн өз ыкмаларын (жарнама, агартуу иштери) колдонушу зарылдыгын белгиледи. Кобицкийдин айтымында, улуу муундагы адамдар шайлоого барууга көнүп бүткөн, ал эми жаштар менен иштөө зарыл.