БИШКЕК, 11-июн. — Sputnik. Кыргызстандын футбол боюнча улуттук курама командасы Омандын футболчулары менен беттеште фаворит болуп саналбайт, ошентсе да мүмкүнчүлүктөрү бар. Бул тууралуу букмекердик конторалардын божомолунан билүүгө болот.
Эске салсак, Оманда 2026-жылкы дүйнө чемпионатына тандоо этабынын финалдык айлампасы өтөт. D тайпасында Кыргызстан, Оман, Малайзия жана Тайбэй болуп төрт команда бар.
Улуттук курама команданын бүгүнкү каршылашы (Оман) тайпада 12 балл менен алдыда. Ал эми Кыргызстан 10 упай менен экинчи, Малайзия жети упай менен үчүнчүдө. Эске салсак, ар бир тайпадан эки мыкты команда дүйнө чемпиондугуна тандоонун 3-туруна өтүп, 2027-жылкы Азия кубогунун (чемпионат) финалдык бөлүгүнө автоматтык түрдө жолдомо алат.
Оман мөөнөтүнөн мурда чыккан. Ал эми Кыргызстан утса же тең чыкса жолдомо алат. Эгер утулуп калса, анда баары Малайзия менен Кытайдын Тайбэйинин ортосундагы беттештен көз каранды болмокчу (букмекерлер малайзиялыктар жеңет деген ишеничте).
"Марафонбет" букмекердик кеңсеси төмөнкүдөй божомол берүүдө (коэффициент канчалык азыраак болсо, жеңүүгө мүмкүнчүлүк ошончолук жогору деп эсептелет):
"Ак шумкарлардын жеңиши" — 3,82;
Оман командасынын жеңиши— 2,01;
Тең чыгуу — 3,38.
Fonbet букмекерлери дагы Кыргызстандын курама командасынын жеңишине ишенүүдө:
Кыргызстан курама командасы — 3,95;
Оман курамасы — 2,05;
Тең чыгуу — 3,2.
FIFA рейтингинде Малайзия курамасы 77-орунда, Кыргызстандыкы 100-орунда. Эскерте кетсек, Бишкекте биздин команда Омандын курама командасын 1:0 эсебинде утуп алган.