БИШКЕК, 14-май — Sputnik. Бишкек шаарынын мэри Айбек Жунушалиев тиешелүү кызматтарга Улуу Ата Мекендик согуштун ардагери Асек Урманбетовго тез арада батир бөлүп берүүнү тапшырды.
Улуу Ата Мекендик согуштун ардагери Асек Урманбетов
© Фото / пресс-служба мэрии Бишкека
Урманбетов 1923-жылы туулган, согуштун майыбы, жесил. Алты баласы жана 68 небереси бар.
"Ал Украина жана Беларусь аймагында согушкан. 1943-жылы декабрда полктун командиринин буйругу менен маанилүү чалгындоо тапшырмасын аткарган. Тагыраагы, ар кандай жүктөрү бар 76 немец машинасын эки жоокери менен кармаган", — деди мэрия.
Асек Урманбетов Ата Мекендик согуш жана Кызыл Жылдыз ордендери, көптөгөн күжүрмөн жана юбилейлик медалдар, ошондой эле Даңк медалы менен сыйланган (2016-ж.). Пенсияга чыкканга чейин башкы бухгалтер, ревизор болуп иштеген. Акын жана жазуучу. "Ак жол" коомдук фондунун президенти катары карыларга, мүмкүнчүлүгү чектелгендерге, кароосуз калган балдарга жардам берип, демөөрчүлүк көрсөтүп келген.