БИШКЕК, 23-апр. — Sputnik. Кыргызстанда курч респиратордук вирустук инфекция жана сасык тумоо менен ооругандардын саны кайрадан өсүүдө. Бул тууралуу Ооруларды алдын алуу жана мамлекеттик санитардык-эпидемиологиялык көзөмөл департаменти билдирди.
Быйылкы жылдын 16-аптасына карата маалыматта (15-21-апрель) КРВИ жана грипп менен 4 406 адам катталганы айтылды. Бул көрсөткүч өткөн жумага салыштырмалуу 16,7 пайызга өскөн. Алардын 69,5 пайызы 14 жашка чейинки балдар экени кошумчаланды.
"Оору эң көп Бишкек жана Ош шаарларында, Ысык-Көл жана Баткен облустарында катталды. Мындан тышкары, өткөн аптада өлкө боюнча COVID-19дун үч учуру аныкталды. Алардын бири Бишкекте болсо, эки учур Ошто катталган", — деп айтылат маалыматта.
Департамент республикадагы эпидемиологиялык абал көзөмөлдө экенин белгиледи.