БИШКЕК, 8-сен. — Sputnik. Россияга ыктаган блогер Микаэл Бадалян менен Sputnik Армениянын баяндамачысы Ашот Геворкян ок атуучу куралды мыйзамсыз айлантып жүргөн деген билдирүүнү Армениянын Тергөө комитети өзүнүн социалдык баракчасына жазганын РИА Новости кабарлады.
"Сюник облусунда 6-7-сентябрда Армениянын Улуттук коопсуздук кызматы козгогон иштин негизинде "Топтошкон адамдардын ок атуучу куралды айлантышы" деп аталган берененин негизинде кылмышка шектелип жети киши кармалган. Анын ичинде Мика Бадалян жана Ашот Геворкян болгон, иш Тергөө комитетине берилген", — деп жазылат ведомствонун маалыматында.
Учурда тергөө иштери жүрүп жатканы айтылды.
Бадалян менен Геворкяндын кечээ кечинде Горис шаарында кармалышы боюнча Sputnik Армения кабарлаган. Агенттиктин маалыматына караганда, Геворкян Сюник облусуна "Мы" аттуу автордук программасына радиоматериал даярдоо үчүн жөнөп кеткен. Ал чек аралаш айылдардын турмушун көрсөтүп берүүнү пландаган.
Ал эми блогер Микаэл Бадалян Горис калаасында дайынсыз болуп жаткандыгын Россотрудничествонун башчысы Евгений Примаков билдирген. Анын айтымында, блогерди Арменияда мурда да камакка алышып, көптөр ага тагылган күнөөнү саясий өңүттө деп билишкен.
РФ ТИМинин расмий өкүлү Мария Захарова Telegram каналына мунун артында Батыш турушу ыктымал экенин белгиледи. Бул кадам Ереванда орус-армян медиафорумун өткөрүүгө жасалган чагым, эки тараптуу алаканы бузууга ниеттенгендердин аракети болушу мүмкүндүгүн да айткан.
"Чагымчылык кылгандар эки мамлекеттин мамилесин бузуп, четте көз салып тургусу келет. Буга Батыш көп каражат сарптаган. Ага багытталган аракеттер соңку убакытта күч алганы белгилүү. "Сөз эркиндиги — ар бир адамдын абсолюттук укугу" деген ураан менен келген бийлик журналисттерди куугунтуктап, маалымат таратууга тоскоолдук кылганын кабыл алгым келбейт", — деген Захарова.
"Россия сегодня" медиатобу да Геворкяндын кармалышы боюнча комментарий таратты. Анда тергөөнүн адилеттүү болоруна ишеним артышары айтылды.
"Биз Sputnik Армениянын баяндамачысы Ашот Геворкяндын кармалышына байкоо салып турабыз. Өзгөчө армян-орус медиафорумун алдында журналисттин кармалышы кескин негиздемелерди талап кылат. Тергөөдө процессуалдык бардык нормалардын, объективдүүлүктүн жана калыстыктын сакталышына ишеним артабыз", — дешти маалымат кызматынан.
Медиатоп Россия менен Армениянын достук байланыштарын бузууга жасалган аракеттердин бардыгын кескин бөгөттөөгө чакырды.