БИШКЕК, 5-янв. — Sputnik. Латвиянын атайын кызматы Sputnik Литва агенттигинин башкы редактору Марат Касемди санкция эрежелерин бузууга жана тыңчылыкка шектүү деп кармады. Бул тууралуу РИА Новости агенттиги жазды.
"Марат Касемди Рига шаарында кармашкан. 5-январда баш коргоо чарасын тандоо боюнча сот отуруму өттү. Касемдин жактоочусу күрөө коюу менен аны коё берүүнү талап кылган, бирок сот абакка киргизүү чечимин кабыл алган. Журналистти бүгүн эле дароо Ригадагы камакка киргизишкен", — деп жазылат маалыматта.
"Россия сегодня" медиатобунун башкы директору Дмитрий Киселев журналисттин кармалышын таптакыр мыйзамсыз деп сыпаттап, акылга сыйгыс деп атаган. Анын айтымында, бул абал Латвиянын сөз эркиндигин колдой албагандыгынан кабар берип, режимин ачык көрсөтүп турат.
Тышкы иштер министрлигинин расмий өкүлү Мария Захарова Касемдин кармалышы сөз эркиндиги жана журналисттердин укугун коргоо жаатында эл аралык милдеттерди бузат деп билдирген. Захарова кармалган журналист коркунуч болуп жатканын бир нече жолу айтканын эске алуу менен ыйгарым укуктуу эл аралык уюмдарды тергөөгө катышууга чакырды.
"Марат Касемдин кармалышы — анын принципиалдуулугу үчүн диктатордук өлкөнүн өчү", — деген Захарова окуя боюнча пикиринде.
Мамдуманын депутаты, эл аралык иштер боюнча комитеттин мүчөсү Мария Бутина журналисттин кармалышы тууралуу айтып, россиялыктарды жактырбай, россиялык журналисттергу кысым көп болорун белгилеген. “Бул жерде Прибалтика негизги ролду ойнойт. Биз ага (Касемге) жардам беребиз", — деген РИА Новости агенттигине.
Марат Касем — Латвиянын жараны. Бир нече жылдан бери Sputnik Литва агенттиги кирген "Россия сегодня" медиатобунда иштейт, Москвада жашайт. Өткөн жылдын декабрь айында ал үй-бүлөлүк абалына байланыштуу Латвияга барган.
"Балтика өлкөлөрүнүн бийлиги россиялык ЖМКлардын ишине биринчи эле жолу бут тосуп жаткан жок. Тышкы иштер министрлигинен журналисттин кармалышынан аталган өлкөлөрдүн макулдашылган аракетинин белгилери көрүнүп турганын билдиришти", — деп жазылат маалыматта.