Эл каттоодо эч кандай документ талап кылынбайт. Жарандар болгону суроолорго гана жооп бериши шарт. Бул тууралуу Айзада Тукашова Sputnik Кыргызстан радиосунда маек куруп жатып билдирди.
Анын айтымында, шылуундардын колуна түшүп калбоо үчүн коопсуздукту дагы эске алуу зарыл.
"Электрондук эл каттоо жүргүзүү үчүн 2019-жылы Ош жана Ысык-Көл облусунда пилоттук режимде сыноо жүргүзүлгөн. Аны өткөрүү үчүн смартфону бар жарандар жумушка алынат. Анткени өлкө бюджети чакталуу болгондуктан каттоочуларды телефон менен камсыздоо татаалыраак болот. Азыр бардык эле жарандарда смартфон бар. Ошондуктан бул жагынан көйгөй жаралбайт. Ал эми коопсуздук маселесине келсек, атайын тендер өткөрүлөт. Андан жеңген мобилдик компания каттоочуларды атайын коргоо каналы бар сим-карта менен камсыз кылат. Бул эл каттоо учурунда алынган маалыматтардын үчүнчү жактарга чыгып кетүүсүн бөгөйт. Купуялуулукту толугу менен сактоо жаатында көптөгөн иштер жасалууда. Каттоочу үйгө келип, атайын тиркемеге анкетаны толтурат. Ал маалымат толугу менен Статкомдун серверине түз түшүп, каттоочунун смартфонунда да калбайт. Телефон жоголуп же уурдалып кетсе тиркеме аралыктан блоктолот. Ал эми адамдардан шек саноо болсо, аны да текшерүүгө мүмкүндүк түзүлөт. Себеби ошол учурда шылуундар да көп чыгышы ыктымал. Алардын торуна түшүп калбоо үчүн тургундар буларды билип алуусу зарыл. Эл каттоодо эч кандай документ талап кылынбайт. Жарандар каттоочунун суроолоруна гана жооп берет. Мындан тышкары, каттоочуга атайын QR-коду менен бейжик берилет. Аны сканерлөө аркылуу каттоочу тууралуу маалымат алууга мүмкүн. Ошондой эле атайын ыкчам телефонго чалуу аркылуу да маалымат алуу үчүн шарт түзүлөт", — деди Тукашова.
Ал эл каттоого аралыктан катышуу мүмкүндүгү жок экенин кошумчалады.