БИШКЕК, 21-янв. — Sputnik. Кыргызстандын орто кесиптик окуу жайларынын айрым кесиптик адистиктерине жаңы кесиптик стандарттар киргизилди. Бул тууралуу Билим берүү жана илим министрлигинин маалымат кызматы билдирди.
Маалыматка ылайык, колледждердеги 15 жана лицейлердеги 10 адистикке киргизилип жаткан стандарттарга ылайык, эми бүтүрүүчүлөр өзүнүн адистиги боюнча негизги концепция жана технологияларды билүүгө тийиш. Мындан сырткары, стандарттык кесиптик көйгөйлөрдү чечүүдө, тапшырмаларды аткарууда жоопкерчиликти өзүнө алууну билиши керек.
Белгилей кетсек, "Инклюзивдүү өнүгүү үчүн көндүмдөр: секторду өнүктүрүү" программасынын алкагында окуу-методикалык бирикмелер, эксперт, иш берүүчүлөрдүн жардамында бүтүрүүчүлөрдүн атаандаштык, чыгармачылык жөндөмдүүлүгүн жогорулатуу жана ишке орноштуруудагы мобилдүүлүк үчүн шарттарды түзүү максатында иштелип чыккан.
Жаңы стандарттар менен окутуу республиканын ар аймагында жайгашкан алдыңкы тажрыйба борборлорунда башталат.