Абдылдаев: аллергиядан жабыркагандар кайрылса жардам беребиз
14:24 11.03.2021 (Жаңыртылды: 14:27 14.12.2021)
© Sputnik / Асель Сыдыкова
Жазылуу
Кыргыз мамлекеттик медициналык кайра даярдоо жана квалификацияны жогорулатуу институтунун аллергология, иммунология боюнча профессордук курсунун башчысы, медицина илимдеринин доктору Талайбек Абдылдаев аллергия менен ооругандар Бишкек шаарында көп экенин айтты.
Абдылдаев: аллергиядан жабыркагандар кайрылса жардам беребиз
Аллергиктер жылдан-жылга көбөйүп жатат. 2030-жылы бронхиалдык астма менен ооругандар эки эсе көбөйүшү болжолдонууда. Бул тууралуу Талайбек Абдылдаев Sputnik Кыргызстан радиосунун эфиринде маек куруп жатып билдирди.
Анын айтымында, чоң шаарларда жашаган аллергиясы бар адамга оорусу курч кармаган мезгилде жер которуу сунушталат.
"Айыл жергесинде айлана-чөйрө, азык-түлүк таза болгондуктан аллергияга чалдыгышпайт деле. Аталган илдет тамак-аштагы ар кандай кошулмалардан, аба ырайынын өзгөрүүсүнөн, синтетикалык оюнчук, дары-дармек, кийимдерден улам пайда болот. Мындан кийин да булардын таасири күчөшү мүмкүн. Андан тышкары, атмосферанын булгануусу да аллергиянын бирден-бир себеби. Жазында бак-дарак гүлдөгөндө аллергик чүчкүрүп, көзү кычышып баштайт. Муну убагында дарылабаса бронхиалдык астмага өтүп кетет. Эгер ата-энесинде аллергия бар болсо, анда балдары, небелери да катуу оорушу мүмкүн. Андыктан алгач бул адамдар үй-бүлөлүк дарыгерлер борборуна барып толук медкароодон өтүшү керек. Эгер аллерголог жок болсо, анда дарыгери мага кайрылса жардам берем. Чындыгында биздин өлкө аймагында бул жаатта адистер абдан аз. Экинчиден, бул маселени чечүү үчүн телемедицинаны уюштуруу зарыл деп эсептейм. Ал эми үчүнчүдөн, аллергиктердин жашоосун жеңилдетүү үчүн атайын топ түзүү зарыл. Алар жашоого керек болгон экологиялык жактан таза продукцияларды камдап беришет. Ошону менен бирге аллергиясы бар адамдардын дары-дармеги өлкө аймагында жетишсиз. Топтун мүчөлөрү аталган маселени республикалык деңгээлде чечүүгө көмөктөшмөк", — деди Абдылдаев.
Дарыгер аллергия менен жабыркагандар жана бул адамдарга жардам берүүнү каалагандар 0553 859 818 номерине байланышса болорун кошумалады.
