Бир адамдан жылына 260 кг таштанды чыгат. Кыргызстанда калдык иргөөдө эмне өзгөрдү
15:04 23.09.2026 (Жаңыртылды: 11:25 24.09.2026)
© Фото / Асел Сыдыкова
Жазылуу
Кыргызстанда калдыктарды жана экинчилик ресурстарды туруктуу башкаруу боюнча мамлекеттик программа иштеп баштады. Бул тууралуу “Ачык кеп” уктуруусунда Жаратылыш ресурстары, экология жана техникалык көзөмөл министрлигинин Калдыктарды жана саркынды сууларды туруктуу башкаруу башкармалыгынын жетектөөчү адиси Нургаакы Исаева билдирди.
Адистин айтымында, программаны даярдоодо акыркы беш жылдагы абал талданып, өнүгүүнүн артыкчылыктуу багыттары жана иш-чаралар планы аныкталат. Исаева калк санынын өсүшү менен чыккан калдык да көбөйүп жатканын белгиледи.
"Мисалы, 2020-жылы жылына бир адамдан 180 килограмм таштанды чыкса, азыр 260ка жетти. Андан тышкары, инфраструктура жана өндүрүштөн чыккан калдыктар көбөйдү. Андыктан Кыргызстанда калдыктарды жана экинчилик ресурстарды туруктуу башкаруу боюнча мамлекеттик программа иштелип баштады. Документ кабыл алынса инвестиция тартып, эл аралык долбоорлорду катыштырууга, мамлекеттик жана жергиликтүү деңгээлде бирдиктүү укуктук жана институционалдык негиз түзүүгө, ошондой эле калдыктар боюнча маалыматтарды системалаштырууга өбөлгө болот. Учурда өлкөдө 290 таштанды төгүүчү жай болсо, анын 71и санкцияланган”, — деди Исаева.
Ал Кара-Балта шаарындагы Талды-Булак айылында япондук "Фукуока" технологиясын колдонуу менен заманбап таштанды полигонун куруу боюнча пилоттук долбоорду ишке киргизүүгө даярдык жүрүп жатканын кошумчалады.
