Путин: БРИКС өлкөлөрүнүн ортосундагы соодада улуттук валютаны колдонуу өсүүдө
23:00 06.07.2025 (Жаңыртылды: 09:27 07.07.2025)
© Photo / Кремль
Жазылуу
БИШКЕК, 7-июл. — Sputnik. БРИКС өлкөлөрүнүн ортосундагы соодада улуттук валюталарды колдонуу тынымсыз өсүүдө. Бул тууралуу Россиянын президенти Владимир Путин билдиргенин РИА Новости жазды.
Ал белгилегендей, 2024-жылы Россиянын БРИКСке кирген башка мамлекеттер менен эсептешүүлөрүндө улуттук валютанын, рублдин жана достук өлкөлөрдүн валюталарынын үлүшү 90 пайызды түздү.
"Өз ара эсептешүүлөрдө улуттук валюталарды колдонууну мындан ары да кеңейтүү зарыл", - деди Путин.
РФ президенти БРИКСтин Бразилиядагы саммитинде (видеобайланыш аркылуу) дагы эмнелерди билдирди:
дүйнөдө чоң өзгөрүүлөр болуп жатат, өз кызыкчылыктарын көздөгөн эл аралык мамилелердин бир уюлдуу системасы эскирди;
либералдык глобалдашуу модели өз ишин токтотууда;
БРИКС сатып алуу жөндөмдүүлүгүнүн паритети боюнча айрым башка бирикмелерден, мисалы, G7ден кыйла ашып түшөт;
БРИКС өлкөлөрүнө жер бетинин үчтөн бири гана эмес, планета калкынын дээрлик жарымы жана дүйнөлүк экономиканын 40%ы туура келет;
БРИКсте дан эгиндеринин биржасын, туруктуу логистикалык платформаны, ошондой эле спорттук кызматташтык программасын түзүү процесстери жүрүп жатат;
БРИКС өлкөлөрү саясат жана коопсуздук, экономика жана финансы, маданий жана гуманитардык байланыштар боюнча негизги багыттарда кызматташууну тереңдетүүнү улантууда;
БРИКС өлкөлөрүнүн технологиялар, ресурстарды өздөштүрүү, логистика, соода, каржы жаатындагы кызматташтыгын активдештирүү маанилүү;
уюмдун дүйнөдөгү кадыр-баркы жана таасири жыл сайын өсүүдө, БРИКС глобалдык башкаруунун негизги борборлорунун арасында өз ордун татыктуу тапты.
БРИКС — 2006-жылы Россия, Кытай, Индия жана Бразилия тарабынан түзүлгөн мамлекеттер аралык бирикме, 2011-жылы ага Түштүк Африка кирген. Ал эми 2024-жылдан тарта Египет, БАЭ, Эфиопия, Иран, 2025-жылдын январь айынан баштап Индонезия кошулган.
